"لیلیٰ" از "شہزادقیس"

اِنتساب

پھر بھی لیلیٰ کے نام
****************************************

ویلنٹائن ڈے:: اِک روز محبت کے لیے کر کے مقرر

****************************************
ویلنٹائن ڈے:: اِک روز محبت کے لیے کر کے مقرر
دِل والوں پہ دُنیا نے بڑا ظلم کیا ہے

#شہزادقیس
.
****************************************

Table of Contents

****************************************

جس شب وُہ شوخ گُل مرا مہمان بن گیا

****************************************
جس شب وُہ شوخ گُل مرا مہمان بن گیا
میں خود غریب خانے کا دَربان بن گیا

سنجیدگی کی چہرے پہ چادَر تو تان لی
پر دِل ہی دِل میں آخری شیطان بن گیا

میری شریر نظروں کی پرواز تھی بلند
دیکھا جو اُس نے گھور کے اِنسان بن گیا

چومی ہُوئی کلی جو اُسے چومنے کو دی
شرم و حیا کا رُخ پہ گلستان بن گیا

شوخی سے بولے ، لکھو غزل ہاتھ چوم کر
پر لکھتے لکھتے حُسن کا دیوان بن گیا

سجدہ کرا کے مجھ سے پڑھی خود نمازِ شکر
کافِر بنا کے مجھ کو مسلمان بن گیا

اُس اَپسرا نے جونہی خریدی مری کتاب
شہزادقیسؔ ذوق کی پہچان بن گیا

#شہزادقیس
.
****************************************

Table of Contents

****************************************


****************************************

سانس لیتی ہُوئی شراب ہو تم

****************************************
سانس لیتی ہُوئی شراب ہو تم
بھاپ اُٹھتا ہُوا کباب ہو تم

بوند پڑنے پہ جو ذِرا سا ہِلے
آہ ! وُہ اَدھ کھِلا گلاب ہو تم

ہر کلی نقل سُرخ لب کی ترے
اور کہنے کو باحجاب ہو تم

رات کی رانی ہو کھُلی چھت کی
چارپائی پہ ماہتاب ہو تم

میری غزلوں پہ دُنیا مرتی ہے
اور غزلوں کا اِنتساب ہو تم

دیکھ کر ہی برے خیال آئیں
جانِ من ! کس قَدَر خراب ہو تم

میرؔ کی دِل سے لکھی پہلی غزل
قیسؔ کی آخری کتاب ہو تم

#شہزادقیس
.
****************************************

Table of Contents

****************************************


****************************************

غُرورِ حُسن میں شاہی جلال ہوتا ہے

****************************************
غُرورِ حُسن میں شاہی جلال ہوتا ہے
پری رُخوں کا سبھی کچھ کمال ہوتا ہے

تراش ایسی کہ رُکتی ہے سانس دَھڑکن کی
پھر اُس پہ چلنا قیامت کی چال ہوتا ہے

قسم خدا کی اے لفظوں سے ماورا لڑکی
بدن اور ایسا بدن ، خال خال ہوتا ہے

پناہ بادَلوں میں ڈُھونڈتا ہے ماہِ تمام
جو بے حجاب وُہ زُہرہ جمال ہوتا ہے

خدا ہی جانے اُسے چوم لیں تو پھر کیا ہو
جو گال نام سے بوسے کے لال ہوتا ہے

اَگر وُہ لب نظر آئیں تو زُلف بھی دیکھو
ہر ایک دانے پہ موجود جال ہوتا ہے

نگاہِ قیسؔ سے دیکھو ، ہمیشہ لیلیٰ کو
صنم کسی کا بھی ہو ، بے مثال ہوتا ہے

#شہزادقیس
.
****************************************

Table of Contents

****************************************


****************************************

بے نقاب اُس نے جب جمال کیا

****************************************
بے نقاب اُس نے جب جمال کیا
سب کی آنکھوں کو یرغمال کیا

پر جَلی تتلیاں ہیں چاروں طرف
شِدّتِ حُسن نے وُہ حال کیا

جونہی دِلکش کلائی دِکھلائی
ٹھیک سے سوچنا محال کیا

اُس کے لب اِتنے نرم و نازُک تھے
پھول نے اُس کے آگے گال کیا

عنبریں زُلف میں سجا کے پھول
پھول کا رُتبہ بے مثال کیا

صرف اِک جان ہی تو مانگی تھی
ہم نے دے دی تو کیا کمال کیا

زَن مریدی کرو کہ قیسؔ کو بھی
عشقِ لیلیٰ نے لازَوال کیا

#شہزادقیس
.
****************************************

Table of Contents

****************************************


****************************************

حُسن کے ناز ، شب اُٹھائے بہت

****************************************
حُسن کے ناز ، شب اُٹھائے بہت
کھٹا ، میٹھا وُہ مسکرائے بہت

خوبصورت بَلا نے اِک نہ سنی
ہم نے تعویذ تو دِکھائے بہت

ساری دُنیا سے مشورہ نہ لو
عقل والو ! ہے دِل کی رائے بہت

تتلیاں جھانسے میں نہیں آئیں
کاغذی پھول گھر میں لائے بہت

بزم میں مجھ کو ڈانٹنے والے
رات اَکیلے میں مسکرائے بہت

عشق نہ ہونا تھا اُسے ، نہ ہُوا
شعر ، ہر رَنگ کے سنائے بہت

بے وَفا کا اُدھار نہ رَکھا
قیسؔ ! ہم نے حسیں رُلائے بہت

#شہزادقیس
.
****************************************

Table of Contents

****************************************


****************************************

ہم سفر ہو تو ایک کام کرو

****************************************
ہم سفر ہو تو ایک کام کرو
گفتگو کے بنا کلام کرو

پلکیں کب تک رُکوع میں رَکھو گے
حُسن کا واسطہ ، قیام کرو

ایک پل آنکھیں چار کر کے مجھے
عمر بھر کے لیے غلام کرو

لیلیٰ بننے سے نہ کرو اِنکار
پیار چاہے ، برائے نام کرو

عُمر بھر جِسم ، بازگشت سُنے
اُنگلیوں سے کبھی کلام کرو

دِل کے اَندر سے کوئی کہتا ہے
حُسن والوں کا اِحترام کرو

جانے کس کا جواب سن لے خدا
قیسؔ ہر شخص کو سلام کرو

#شہزادقیس
.
****************************************

Table of Contents

****************************************


****************************************

حُسن پر دِل لگا کے کام کرو

****************************************
حُسن پر دِل لگا کے کام کرو
اِک غزل اور اُن کے نام کرو

اِس کا سورج غُروب ہوتا نہیں
حُسن کی مملکت میں شام کرو

گیسوئے یار سے گزارش ہے
بادِلوں کا تو اِحترام کرو

حُکمِ پردہ بتائیں گے واعظ
کچھ حَسینوں کا اِنتظام کرو

بات ایسے کرو کہ پھول کھلیں
پیار سے سنگ دِل کو رام کرو

پیار ہر دین کا خلاصہ ہے
جس قَدَر ہو سکے یہ عام کرو

غسل کر کے مے ء قدیم سے قیسؔ
سُرخ لب دار کو اِمام کرو

#شہزادقیس
.
****************************************

Table of Contents

****************************************


****************************************

محبت اِک سمندر ہے ، ذِرا سے دِل کے اَندر ہے

****************************************
محبت اِک سمندر ہے ، ذِرا سے دِل کے اَندر ہے
ذِرا سے دِل کے اَندر ہے مگر پورا سمندر ہے

محبت رات کی رانی کا ، ہلکا سرد جھونکا ہے
محبت تتلیوں کا ، گُل کو چھُو لینے کا منظر ہے

محبت باغباں کے ہاتھ کی مِٹّی کو کہتے ہیں
رُخِ گُل کے مطابق خاک یہ سونے سے بہتر ہے

جہانِ نو ، جسے محبوب کی آنکھوں کا حاصل ہو
فقیہہِ عشق کے فتوے کی رُو سے وُہ سکندر ہے

محبت ہے رَمی شک پر ، محبت طوفِ محبوبی
صفا ، مروہ نے سمجھایا ، محبت حجِ اَکبر ہے

اَگر تم لوٹنا چاہو ، سفینہ اِس کو کر لینا
اَگر تم ڈُوبنا چاہو ، محبت اِک سمندر ہے

سنو شہزاد قیسؔ آخر ، سبھی کچھ مٹنے والا ہے
مگر اِک ذات جو مشکِ محبت سے معطر ہے

#شہزادقیس
.
****************************************

Table of Contents

****************************************


****************************************

سات پشتوں پر مری اِحسان ہونا چاہیے

****************************************
سات پشتوں پر مری اِحسان ہونا چاہیے
آپ کو اِک شب مرا مہمان ہونا چاہیے

آسمانوں پر اَگر بنتے ہیں جوڑے تو جناب
مسجدوں سے عشق کا اِعلان ہونا چاہیے

زِندگی کے ہم سفر میں اور خوبی ہو نہ ہو
شاعری کی سمت کچھ رُجحان ہونا چاہیے

حُسن والوں کی اَدا سے حادثے ہوتے تو ہیں
لڑکیوں کا چلنے پہ چالان ہونا چاہیے

پھول مارا آپ نے ، دُشمن خوشی سے کھل اُٹھا
آپ کے ہاتھوں میں اَب گلدان ہونا چاہیے

’’پاک‘‘ یعنی صاف اور ’’اِستان‘‘ کا معنی جگہ
ہر گلی کوچے کو ’’پاک اِستان‘‘ ہونا چاہیے

قیسؔ جیسے منتخب ہوں بھاری رائے سے جہاں
عاشقوں کا بھی کوئی ایوان ہونا چاہیے

#شہزادقیس
.
****************************************

Table of Contents

****************************************


****************************************

بخت جس دِن ہمیں ملا دے گا

****************************************
بخت جس دِن ہمیں ملا دے گا
سچ بتا پہلے مجھ کو کیا دے گا

چہرے سے زُلف ہی ہٹا لے اَگر
شب ڈَھلے تُو تو دِن چڑھا دے گا

اَوڑھ لوں گر میں دُوسرا آنچل
غالبا یار مسکرا دے گا

اِک نظر عشق کے گدا پر بھی
تُو مجھے دے ، تجھے خدا دے گا

عشق دُنیا سے سیکھ کر جاؤ
جنتی میوہ تب مزا دے گا

گر تجھے سُرخ پھول پیش کروں
سُرخ لب والے مجھ کو کیا دے گا

اُن کی ٹھوڑی کے تل کا نہ پوچھو
قیسؔ پوری غزل سنا دے گا !

#شہزادقیس
.
****************************************

Table of Contents

****************************************


****************************************

کن خیالوں میں آپ رہتے ہیں؟

****************************************
کن خیالوں میں آپ رہتے ہیں؟
اَب ’’سمندر‘‘ بھی اُلٹے بہتے ہیں

آپ کے بعد بھی رہے زِندہ
غالباً اِس کو جبر کہتے ہیں

دَھڑکنوں کی جگہ پہ اَب دِل میں
غم خوشی سے اُچھلتے رہتے ہیں

خون رونے کی لاکھ کی کوشش
آنکھ سے صرف اَشک بہتے ہیں

ٹھنڈا پانی پئیں گھڑے کا جناب!
حُسن کو بے وَفا جو کہتے ہیں

زِندگی اِک ٹرین ہے بھائی!
لوگ چڑھتے ، اُترتے رہتے ہیں

فائدہ کیا ہے نوکروں کا بھلا
غم تو سب اَپنا اَپنا سہتے ہیں

پہلے رونے سے دائمی چُپ تک
اِس بدن میں زَمانے رہتے ہیں

پیار کی پیاس ، اَصل پیاس ہے دوست
چشمے پانی کے ، لاکھوں بہتے ہیں

لیلیٰ لیلیٰ ہو لب پہ موت تلک!
کوّے تب قیس قیس کہتے ہیں

#شہزادقیس
.
****************************************

Table of Contents

****************************************


****************************************

حشر میں ڈُھونڈ کے اُن کو کہا آداب جناب

****************************************
حشر میں ڈُھونڈ کے اُن کو کہا آداب جناب
خوب آنچل کو نہ پا کر ہُوئے آب آب جناب

آپ کے منہ سے تو جھڑنے لگے گُل گالی کے
ہم کسی اور کو بتلائیں گے یہ خواب جناب

حشر سے بھی ہے فُزوں ، کُوچۂ لیلیٰ کا جُنوں
قتل ہوتے ہیں کہاں حشر میں اِحباب جناب

گُل مہکنے سے ہے شاداب چمن ہستی کا
کس کی خوشبو نے کیے گُل سبھی شاداب جناب

چاند کو ڈُھونڈنے ہم سارے نکلتے ہیں مگر
ڈُھونڈنے کس کو نکلتا ہے یہ مہتاب جناب

آپ پہ لکھ دُوں میں دیوان مگر دیکھوں تو
منہ زَبانی تو میں لکھتا نہیں اِک باب جناب

زِندہ رہنے کا اُسے کوئی اَدِھیکار نہیں
مجنوں گر لیلیٰ کی خاطر نہ ہو بے تاب جناب

حُسن والوں سے کوئی جنگ کہاں جیتا ہے
حُسن کے پاؤں پڑے رُستم و سہراب جناب

آج اِک بوسہ طلب کرنے کا سوچا جائے
آج معمول سے کچھ بڑھ کے ہیں شاداب جناب

آپ ’’ تم جیسے ‘‘ ہمیں شوق سے کہیے لیکن
ہو نہ جائیں کہیں ہم جیسے بھی نایاب جناب

قیسؔ نے چاہا تمہیں ، جُرم کیا ، مان لیا
جُرم کے کس نے مہیا کیے اَسباب جناب !

#شہزادقیس
.
****************************************

Table of Contents

****************************************


****************************************

اَللہ اَللہ جمال اُن کا ہے

****************************************
اَللہ اَللہ جمال اُن کا ہے
حُسن ، کومل کمال اُن کا ہے

شَہد ، بادَل ، صراحی ، جھیل ، کنول
جو بھی اَچھا ہے مال اُن کا ہے

دِل میں گو کہ خیال لاکھوں ہیں
سب سے اُونچا خیال اُن کا ہے

اُن کا اِک بال بھی گو میرا نہیں
پر مرا بال بال اُن کا ہے

آخری سال میرا یہ ہو گا
سولہواں چونکہ سال اُن کا ہے

دِل ، جگر ، جاں ہے میری اُن کے پاس
میرے پاس اِک رُومال اُن کا ہے

آگ بھڑکاتا ہے تجسس کی
پردہ ’’ دَرپردہ ‘‘ جال اُن کا ہے

آنکھ میں غم کی سرمگیں مالا
اور لب پر سوال اُن کا ہے

دوستو ! بن مُبالغے کے سنو
آفتاب ایک خال اُن کا ہے

وُہ اَداؤں کے پیر و مرشِد ہیں
منتظِر ہر غزال اُن کا ہے

حُسنِ بندش کی اَوج سیکھو قیسؔ
شَہر بھر یرغمال اُن کا ہے

#شہزادقیس
.
****************************************

Table of Contents

****************************************


****************************************

جب دو دِلوں کے بیچ میں دیوارِ چین ہو

****************************************
جب دو دِلوں کے بیچ میں دیوارِ چین ہو
اِک دُوسرے کی بات کا کیسے یقین ہو

کچھ اِعتماد کر تو کروں گفتگو شروع
بنیاد رَکھنے کے لیے کچھ تو زَمین ہو

دِل کا حرم ، کِرائے کا کمرہ نہیں جناب !
اِس گھر کے آپ اَوّل و آخر مکین ہو

چہرہ دَھنک کے رَنگ کو شرما رَہا ہے تم
رِفعت کے آسمان کی زُہرہ جبین ہو

سانسوں میں تیرے نام کی خوشبو تک آ بسی
رُوحِ گلاب تجھ پہ ہزار آفرین ہو

تتلی نے اُس کو روک کے بے ساختہ کہا
میں چھوڑ آؤں ؟ آپ بہت نازنین ہو

آمد سے ایک حُور کی ایسے بدل گیا
جیسے یہ گھر زَمین پہ خلدِ برین ہو

بس پاؤں چومنے کی اِجازت مجھے ملی!
پھر کیا ہُوا یہ سوچ لو ، تم تو ذَہین ہو

کس سے کریں شکایتیں ہم اِہلِ حُسن کی
جب ’’ حُسنِ بے مثال ‘‘ ہی مسند نشین ہو

چہرے کی خیر ، اِس پہ نشیب آ بھی سکتا ہے
دِل دیجیے اُسی کو جو دِل کا حسین ہو

جب قیسؔ آئینہ بھی اُنہیں ڈانٹنے لگا
بانہوں میں تھام کر کہا : ’’ دِلکش ترین ہو ! ‘‘

#شہزادقیس
.
****************************************

Table of Contents

****************************************


****************************************

اِسی سہارے پہ دِن ہجر کا گزارا ہے

****************************************
اِسی سہارے پہ دِن ہجر کا گزارا ہے
خیالِ یار ، ہمیں یار سے بھی پیارا ہے

صبا کا ، اَبر کا ، شبنم کا ہاتھ اَپنی جگہ
کلی کو پھول نے جھک جھک کے ہی نکھارا ہے

کسی کے ہاتھ پہ منہدی سے دِل بنا دیکھا
میں یہ بھی کہہ نہ سکا یہ تو دِل ہمارا ہے

نقاب پالکی میں بھول آئے کیوں حضرت
تمام شہر نے کیا آپ کا بگاڑا ہے

تم آسماں پہ نہ ڈُھونڈو سیاہ بدلی کو
کسی نے ہاتھ سے گیسو ذِرا سنوارا ہے

چلو بہارِ چمن لے کے گھر کو لوٹ چلیں
دَھنک کی لے میں کسی شوخ نے پکارا ہے

یہ ہاتھ چھوڑنے سے پیشتر خیال رہے
خدا کے بعد فقط آپ کا سہارا ہے

جو عمر بیت چکی وُہ حسابِ ہجر میں لکھ
جو سانس باقی ہے دُنیا میں وُہ تمہارا ہے

گھٹا ، صراحی ، دَھنک ، جھیل ، پنکھڑی ، شبنم
بدن ہے یا کسی شاعر کا اِستعارہ ہے

یقیں تھا اُس کو کہ ہم شعر اِن پہ کہہ لیں گے
خدا نے حُسن ، قلم دیکھ کر اُتارا ہے

صنم کو دیکھ کے ، کچی کلی نے ’’کھُل‘‘ کے کہا:
’’بہت ہی اُونچی جگہ قیسؔ ہاتھ مارا ہے‘‘

#شہزادقیس
.
****************************************

Table of Contents

****************************************


****************************************

حُسن والے وُہ کام کرتے ہیں

****************************************
حُسن والے وُہ کام کرتے ہیں
لفظ جھک کر سلام کرتے ہیں

عُمر بھر یہ غلام نہ سمجھا !
آپ کیسے غلام کرتے ہیں ؟

خوش نصیبی گُلوں پہ ختم ہُوئی
اُن کی زُلفوں میں شام کرتے ہیں

قصۂ عشق آگے بڑھ نہ سکا
وُہ میرا ’’ اِحترام ‘‘ کرتے ہیں

’’ با اَدَب ، با ملاحظہ ‘‘ گھر میں
اَب ! کبوتر قیام کرتے ہیں

فتویٰ تعبیر پر ہے لاگو حضور !
خواب کو کیوں حرام کرتے ہیں ؟

جام تو توڑ بیٹھے منبر پر
اَب سَبُو کو اِمام کرتے ہیں

’’ چار خانے ‘‘ بنائے بیٹھا ہے ؟
دِل ! ترا اِنتظام کرتے ہیں !

ہو نہ ہو اُن کے دِل میں ہے کوئی
جو مری غزلیں عام کرتے ہیں

سب شروع کرتے ہیں بنامِ خدا
ہم خدا پر تمام کرتے ہیں

بن ملے جن سے قیسؔ عشق ہُوا !
یہ غزل اُن کے نام کرتے ہیں

#شہزادقیس
.
****************************************

Table of Contents

****************************************


****************************************

مایوس ہونا لگتا ہے معیوب بھی مجھے

****************************************
مایوس ہونا لگتا ہے معیوب بھی مجھے
دِل دے دِیا تو دے گا وُہ محبوب بھی مجھے

سترہ کتابیں اور تمہارا وُہ ایک خط
اے جانِ جاں سکھاؤ یہ اُسلوب بھی مجھے

لکھا تو جیسے دِل پہ قلم رَکھ کے لکھ دِیا
حیرت میں غرق کر گیا مکتوب بھی مجھے

کر دیں جو رُونمائی تو کیا بات ہے جناب
ویسے تو یہ تڑپنا ہے مرغوب بھی مجھے

آنچل کے سائبان میں آنے کی راہ دو
پردہ نشیں ہو تو کرو محجوب بھی مجھے

مرشِد نے ایک آنکھ سے دیکھا تھا ایک بار
مرشِد سمجھنے لگ گئے مجذوب بھی مجھے

نظریں جھکائیں یوں کہ میں جھکتا چلا گیا
غالب بنا کے کر لیا مغلوب بھی مجھے

لیموں کی جان نکلی یوں نازک سے ہاتھ میں
دیسی شراب بن گیا مشروب بھی مجھے

شبنم سے ہر گلاب پہ لکھ دُوں صنم کا نام
پر اُن کو مخفی رَکھنا ہے مطلوب بھی مجھے

اُس حُسن کے بغیر ہی کٹنی ہے گر حیات
مولا عطا ہو طاقتِ اَیوب بھی مجھے

مُنکِر ہے گرچہ پیار کا وُہ صاف صاف قیسؔ
بینَ السُطُور رَکھتا ہے مصلوب بھی مجھے

#شہزادقیس
.
****************************************

Table of Contents

****************************************


****************************************

حیات بیچ کے خوش لَب قضا خریدیں گے

****************************************
حیات بیچ کے خوش لَب قضا خریدیں گے
کرم ہُوا تو صنم کی رِضا خریدیں گے

چرا کے دِل کسی پرہیز گار گڑیا کا
وُفورِ عشق میں ڈُوبی دُعا خریدیں گے

جو سر میں اُنگلیاں پھیرے وُہ عکس لائیں گے
جو شعر پڑھتا ہو وُہ آئینہ خریدیں گے

کسی کے سامنے بھنبھوڑ کے لبوں سے گُلاب
گلابی گالوں پہ اُتری حیا خریدیں گے

مری کتاب ہے اور اُس حسین کی تصویر!
مجھے پتہ تو چلے ، آپ کیا خریدیں گے

طبیبِ عشق ! دَوا ’’حسبِ ذائقہ‘‘ کہہ دے
تو نرم ، میٹھی ، ملائم دَوا خریدیں گے

دَبی دَبی سی ہنسی قید کر کے بانہوں میں
لَبوں سے چہرے کی اِک اِک اَدا خریدیں گے

شراب خانہ مکمل پلا کے ساقی کو
بھری جوانی میں بہکی قضا خریدیں گے

ہم اَپنے شَہر کی ، ملکۂ حُسن کی خاطر
تمہارے شَہر سے ، اِک آئینہ خریدیں گے

ہر ایک چیز ، برائے فروخت رَکھ دیں گے
تمہارے پیار کی ، ہم اِنتہا خریدیں گے !

شراب بیچنے والوں پہ قیس حیراں ہُوں
شراب بیچ کے ، آخر یہ کیا خریدیں گے !

#شہزادقیس
.
****************************************

Table of Contents

****************************************


****************************************

وُہ آئے تو لب پر سوال آ گیا

****************************************
وُہ آئے تو لب پر سوال آ گیا
اَجی آج کیسے خیال آ گیا

تم آئے کہ خوشیوں پہ عید آ گئی
تم آئے کہ خنداں ہلال آ گیا

رُکوع دَر رُکوع پھول جھُکنے لگے
خِراماں خِراماں غزال آ گیا

تعجب سے رُکنے لگیں تتلیاں
رُخِ یار پر وُہ جمال آ گیا

بہار اُن پہ جونہی چڑھی سولہویں!
نُجومی پکارا وُہ سال آ گیا

پڑھا دیکھ کر اُن کو لاحول کیوں
اَرے زاہدو! کیا خیال آ گیا؟

حیا سرخ گالوں پہ اِتنی سجی
کہ قوسِ قُزَح پر زَوال آ گیا

جو ڈالی فقط طائرانہ نظر
حسینہ کے رُخ پر جلال آ گیا

وُہ غصے میں اَب قتل کرتے نہیں
طبیعت میں کچھ اِعتدال آ گیا

دَرِ حُسن پر سر جھکاتے ہی قیس
ہمارے قلم پر کمال آ گیا

#شہزادقیس
.
****************************************

Table of Contents

****************************************


****************************************

حُور دُنیا میں ملی تھی ، پر مری مانے گا کون

****************************************
حُور دُنیا میں ملی تھی ، پر مری مانے گا کون
جنت اَپنے گھر میں ہی تھی ، پر مری مانے گا کون

غنچے اُڑتے پھر رہے تھے روشنی میں اَبر کی
چاندنی خوشبو بھری تھی ، پر مری مانے گا کون

خوشنما ، قوسِ قُزح تھی ، جگنوؤں کے جسم پر
تتلیوں میں روشنی تھی ، پر مری مانے گا کون

آنکھوں دیکھا واقعہ ہے ، ایک ضِدّی دِل رُبا
اِس غزل پر مر مٹی تھی ، پر مری مانے گا کون

اُس نے پاؤں کیا دَھرے ، گھر میں اُجالا بھر گیا
شَہر بھر میں رات ہی تھی ، پر مری مانے گا کون

ریت کی برکھا میں دُھل کے ، کھِل اُٹھے دِل کے گُلاب
بارِشوں میں تشنگی تھی ، پر مری مانے گا کون

شَہرِ خاموشاں میں نِصفِ شَب کی سُوئیاں ملتے ہی
زِندگی ہی زِندگی تھی ، پر مری مانے گا کون

آئینے سے جب ذِرا سا ، دُور ہٹ کے رو پڑے
عکس نے آواز دی تھی ، پر مری مانے گا کون

شاخ سے بچھڑی کلی پہ ، شبنمی قطرے نہ تھے
وُہ تو تتلی رو رہی تھی ، پر مری مانے گا کون

شک پرست اِحباب کو میں ، قیسؔ گو یہ کہہ تو دُوں!
یہ غزل ’’کچھ‘‘ عام سی تھی ، پر مری مانے گا کون

#شہزادقیس
.
****************************************

Table of Contents

****************************************


****************************************

یار سے ہاتھ جب ملاؤں گا

****************************************
یار سے ہاتھ جب ملاؤں گا
آہ! شاید میں مر ہی جاؤں گا

چاند یاقوت لب کا آئے نظر
عید میں حشر تک مناؤں گا

آئینے سے صنم تراشا ہے!
تم کبھی آؤ تو دِکھاؤں گا

جانے وُہ کس گلی میں اُتریں گے
شَہر کی ہر گلی سجاؤں گا

کتنا پاگل ہُوں یہ تو سوچا نہیں
آپ کو کس جگہ بٹھاؤں گا

جلد مانوس ہوں گے یوں مجھ سے
اُن کو ملتے ہی منہ چِڑاؤں گا

مٹھی میں جگنو بھر کے زُلفوں میں
چاہتوں کے دِئیے جلاؤں گا

عشق دَریا سے تو بڑا ہے مرا
اَپنا رَستہ میں خود بناؤں گا

کتنا خوش ہوں گے ٹوک کر وُہ مجھے
خود غلط شعر گنگناؤں گا

قیس اِس مقطع میں ہے جادُو سا!
لوگ ہنس دیں گے جب سناؤں گا

#شہزادقیس
.
****************************************

Table of Contents

****************************************


****************************************

حسیں خیال جو پاؤں کو گدگدانے لگے

****************************************
حسیں خیال جو پاؤں کو گدگدانے لگے
وُہ نیند میں بھی مرے شعر گنگنانے لگے

میں اَپنی غزلوں کی رَعنائیوں سے جلنے لگا
مری کتاب وُہ آغوش میں سلانے لگے

جو خط میں لکھا کہ اَب نیند تک نہیں آتی
وُہ تکیہ بھینچ کے بانہوں میں مسکرانے لگے

کبھی نقاب میں چھُپ کر ، کبھی بنا آنچل
وُہ میرے پیار کو ہر رُخ سے آزمانے لگے

وُہ لب پہ سوچ میں گم اُنگلی پھیرتے ہیں یا
ہمیں سلیقے سے میٹھی چھری دِکھانے لگے

کہا جو اُن کو کہ کچھ لوگ جادُو کرتے ہیں
وُہ اُنگلی گھول کے مشروب میں پلانے لگے

’’ نہیں ‘‘ پہ حُسن کی رِہ رِہ کے پیار آیا مجھے
وُہ بازُؤوں میں مرے ’’ نیم ‘‘ کسمسانے لگے

لبوں سے بال برابر ، لبوں کو روک لیا
حیا سے جنگ میں دو ہونٹ کپکپانے لگے

خیال خوانی میں یکجائی کا یہ عالم ہے
اُنہیں ہمارے ، ہمیں اُن کے خواب آنے لگے

وُہ اِس مُراقبے سے تھی مری دُعا میں مگن
کہ لوگ قدموں میں اُس کے دِئیے جلانے لگے

زَمانے بھر میں لُٹا کر بھی ہم غنی ہیں قیسؔ
ہمارے ہاتھ محبت کے وُہ خزانے لگے

#شہزادقیس
.
****************************************

Table of Contents

****************************************


****************************************

آپ کو بھی ہے گر دَغا دینا

****************************************
آپ کو بھی ہے گر دَغا دینا
تو مجھے پہلے سے بتا دینا

دِل لگانا تو صِدقِ دِل کے ساتھ
ہاتھ تھامو تو آسرا دینا

عشق کا پہلا گام اُف اَللہ
دُشمنِ جان کو دُعا دینا

باغ میں تیسرے شجر پر دِل
جب بھی موقع ملے بنا دینا

خوف آئے اَگر فصیلوں سے
دیپ دیوار پر جلا دینا

عشق کے اَشک بھی مقدس ہیں
غمِ دُنیا میں نہ ملا دینا

اِک ہتھیلی بنی ہے دَستِ طلب
دُوسرا ہاتھ تم بڑھا دینا

اَپنے ’’ ناطے ‘‘ کا کوئی نام نہیں
دیکھ کر ہاتھ نہ ہلا دینا

پیار کی اِک بڑی نشانی ہے
وَقت بے وَقت مُسکرا دینا

عُمر بھر مُنتَظِر رَہوں گا مگر !
آنے میں عُمر نہ لگا دینا

کل کسی نے مشاعرے میں کہا !
قیسؔ جب آئے تب جگا دینا

#شہزادقیس
.
****************************************

Table of Contents

****************************************


****************************************

خوبصورتی کی حد ہے نہ حساب ہے

****************************************
خوبصورتی کی حد ہے نہ حساب ہے
تُو گلاب ، تُو گلاب ، تُو گلاب ہے

چودہویں کا چاند ، نصفِ دِن کا آفتاب
چندے آفتاب ، چندے ماہتاب ہے

چار سو کروڑ تتلیوں میں تُو مرا
اِنتخاب ، اِنتخاب ، اِنتخاب ہے

جسم کی مہک نے جگنو مست کر دِئیے
کہہ رہے ہیں یہ گلاب ، لاجواب ہے

دُھوپ میں جو مینہ بَرَس پڑے تو جانئے
اَبر زُلفِ یار دیکھ آب آب ہے

خواب میں بھی اُن کے آگے ایک نہ چلی
بولے جاگ جاؤ یہ ہمارا خواب ہے

ایک پل کو دیکھ لے ہمیں بھی پیار سے
یہ ثواب دَر ثواب دَر ثواب ہے

حُسن کی نگاہ میں حیا کے سُرخ پھول
آج کل کے دور میں یہ اِنقلاب ہے

عشق نے جہاں پہ لکھ دِیا تمام شد
حُسن کی کتاب کا وُہ پہلا باب ہے

قیس اُن نگاہوں میں چمک سی پیار کی
اِک نئی کتاب کا یہ اِنتساب ہے

#شہزادقیس
.
****************************************

Table of Contents

****************************************


****************************************

پھول چنتی دِل رُبا ، یادَش بخیر

****************************************
پھول چنتی دِل رُبا ، یادَش بخیر
گاؤں کی ٹھنڈی ہَوا ، یادَش بخیر

حُسنِ تسلیمات ، کھِلتے حُسن کا
عشق کی کچی وَفا ، یادَش بخیر

شعر کا مطلب سمجھ کر چونکنا
سرخ گالوں پر حیا ، یادَش بخیر

حرف پہلا نام کا لکھا ہُوا
پھول ہاتھوں کی حنا ، یادَش بخیر

ایک ہی خواہش کا دورِ پُرسُکوں
چاند راتوں کی دُعا ، یادَش بخیر

یاد کے صحرا میں ، پتھر کی لکیر
یار کی ہر ہر اَدا ، یادَش بخیر

پہلی بارِش کی ، جواں بوندوں کے بیچ
خاص طرح کانپنا ، یادَش بخیر

خود سے مجھ کو عشق کرواتا گیا
اُس کا چھپ چھپ دیکھنا ، یادَش بخیر

اِک بھلا سا نام تھا ، اُس شوخ کا
ساتھ رہنا تھا سدا ، یادَش بخیر

قیس لے لوں ، سال دے کر گر ملے
ایک پل اُس پیار کا یادَش بخیر

#شہزادقیس
.
****************************************

Table of Contents

****************************************


****************************************

حرف دَر حرف خواب اُن کا ہے

****************************************
حرف دَر حرف خواب اُن کا ہے
کیا لکھوں کیا شباب اُن کا ہے

زُلف ، پھر اُس میں پھول ، اُف اَللہ !
رُخ ، رُخِ ماہتاب اُن کا ہے

ہونٹ ، برگِ گلاب بھیگا ہُوا !
جسم ، جامِ شراب اُن کا ہے

ہاتھ سے کھول دی ہے کچی کلی
کتنا رَوشن جواب اُن کا ہے

ایک ہی وار ، وُہ بھی دِل پہ کرو
سیدھا سادہ حساب اُن کا ہے

رُخ پہ معصومیت کا پَہرا ہے
کام یہ کامیاب اُن کا ہے

عقل تو میری اِک بھی سنتی نہیں
دِل بھی خانہ خراب اُن کا ہے

اِبنِ جِن کی جبیں پہ ہے محراب
آتشیں تر شباب اُن کا ہے

عنکبوتوں نے ’’ واہ واہ ‘‘ کہا
اِتنا نازُک نقاب اُن کا ہے

وُہ جو پھولوں میں چھُپ کے بیٹھے ہیں
کتنا اَچھا حجاب اُن کا ہے

قیس سب سے حسین شاعر ہے !
چونکہ وُہ ’’ اِنتخاب ‘‘ اُن کا ہے

#شہزادقیس
.
****************************************

Table of Contents

****************************************


****************************************

رَبط کا سلسلہ بڑھا کہ نہیں

****************************************
رَبط کا سلسلہ بڑھا کہ نہیں
گُل ترا ، زُلف تک گیا کہ نہیں

منزلِ وَصل کی تُو فکر نہ کر
فاصلہ ، روز کچھ گھٹا کہ نہیں

تیز بارِش میں سب ہی رُکتے ہیں
اِلتجا پر تری رُکا کہ نہیں

ایک دِن ساتھ مل کے روئے گا
اَب ترے حال پر ہنسا کہ نہیں

میں ترے اِستعاروں پر قربان!
بات وُہ کچھ سمجھ سکا کہ نہیں

کتنے مغرور ہو جنابِ مَن
آپ کا ہے کوئی خدا کہ نہیں

غیب کے رازدان! ، ہجر کے دِن
لیلیٰ کے دِل کو کچھ ہُوا کہ نہیں

مجنوں نے تو ’’کتاب‘‘ لکھ ڈالی!
لیلیٰ نے شکریہ لکھا کہ نہیں

نیم جاں کہہ کے ہنسنے والی ہَوا
یہ دِیا رات بھر جلا کہ نہیں

ذِکرِ مجنوں کو زِندہ دیکھ کے قیس !
حوصلہ تجھ کو کچھ ملا کہ نہیں

#شہزادقیس
.
****************************************

Table of Contents

****************************************


****************************************

گفتگو سے اِجتناب اَچھا لگا

****************************************
گفتگو سے اِجتناب اَچھا لگا
آنکھوں ، آنکھوں میں جواب اَچھا لگا

دَھڑکنوں کو روک کر سننے لگے
اِس قَدَر اُن کا خطاب اَچھا لگا

حُور ایسی آج دیکھی راہ میں
نیکیوں کا ’’ اِرتکاب ‘‘ اَچھا لگا

اُف ! سجانے والا تو ’’ خود ‘‘ سج گیا
زُلف میں تازہ گلاب اَچھا لگا

پہلے بے باکی سے اُن کی عشق تھا
آج اُن کا اِضطراب اَچھا لگا

اَپنے کرنے کا بھی کوئی کام ہو
جب ’’ یہ ‘‘ سوچا تو حجاب اَچھا لگا

نیند میں چلتے رہے پانی پہ ہم
رات بھر اِک آفتاب اَچھا لگا

اِس قَدَر ڈُھونڈا تجھے ، رَب مل گیا
ہجر میں گزرا شباب اَچھا لگا

ایک آنسو کُل خطائیں دُھو گیا
قاضی ء کُل کا حساب اَچھا لگا

شعر دُنیا کو پسند آئے ، ہمیں
آپ کے نام اِنتساب اَچھا لگا

ڈُھونڈتی پھرتی ہے لیلیٰ ، قیسؔ کو
آسماں ! یہ اِنقلاب اَچھا لگا

#شہزادقیس
.
****************************************

Table of Contents

****************************************


****************************************

یار پھر تم سا یار ، اُف توبہ

****************************************
یار پھر تم سا یار ، اُف توبہ
پیار پھر پہلا پیار ، اُف توبہ

زَخم سب کو دِکھا تو سکتے ہیں
آپ کا اِنتظار ، اُف توبہ

کوہساروں سے اُتری دوشیزہ
اِک شتر بے مہار ، اُف توبہ

دیکھ کر شیخ توبہ توبہ کرے
حُسن کا شاہکار اُف توبہ

ہنستے ہنستے حسین ملکہ نے
کر دِیا دِل پہ وار ، اُف توبہ

جھیل میں کوئی نصف ہی اُبھرا
چیخ اُٹھے کوہسار اُف توبہ

شرم سے گُل نے خود کشی کر لی
سُرخ لب پر بہار ، اُف توبہ

ہم تو حیرت زَدہ تھے کلیوں پر
تتلیوں کا سنگھار ، اُف توبہ

عشق منسوخ کرنے پہنچا ، پڑی
نرم ہاتھوں سے مار ، اُف توبہ

شرم سے دِل پہ ہاتھ رَکھ کے کہا
دیکھ یوں نہ پکار ، اُف توبہ

کھلکھلا کر کہا یہ لیلیٰ نے
قیسؔ ! اور شرمسار ، اُف توبہ

#شہزادقیس
.
****************************************

Table of Contents

****************************************


****************************************

اَگر کسی کو ستانا حرام ہوتا ہے

****************************************
اَگر کسی کو ستانا حرام ہوتا ہے
تو پھر تو کچھ بھی چھپانا حرام ہوتا ہے

بِنا بتائے مرے دِل میں آنے والے سُن !
کسی کے گھر میں یوں آنا حرام ہوتا ہے

یہ آنکھیں رَکھتے ہی کیوں ہو نقاب سے باہر
اَگر نظر کو ملانا حرام ہوتا ہے

یقین مانیے اِخلاقِ اَعلیٰ کی رُو سے
کسی کو جوتی دِکھانا حرام ہوتا ہے

کوئی بھی چیز چُرانا حرامِ مطلَق ہے
چنانچہ آنکھ چُرانا حرام ہوتا ہے

کچھ اِس طرح سے اُتارا ہے حُسن لفظوں میں
کہ بولے عکس بنانا حرام ہوتا ہے

وُہ آ گئے ہیں تو سورَج کا جانا بنتا ہے
چراغ دِن میں جلانا حرام ہوتا ہے

اے کاش مفتی کوئی اُس حسیں کو یہ کہہ دے
نفی میں سر کو ہلانا حرام ہوتا ہے

یہ کہہ کے لیلیٰ نے چھینا قلم غزل لکھتے
کسی کے راز بتانا حرام ہوتا ہے

نماز چھوڑنا ہی شیخ جی حرام نہیں
کسی کا دِل بھی دُکھانا حرام ہوتا ہے

قسم اُٹھا کے اُسے چھوڑ دیتا قیس مگر !
قسم بھی جھوٹی اُٹھانا حرام ہوتا ہے

#شہزادقیس
.
****************************************

Table of Contents

****************************************


****************************************

دُھوپ میں وُہ شباب دیکھا ہے

****************************************
دُھوپ میں وُہ شباب دیکھا ہے
وَجد میں آفتاب دیکھا ہے

گیسوؤں والا چاند بھی ہو گا
چلتا پھرتا گلاب دیکھا ہے

تین منصوبے دِل بناتا ہے
جب سے اُس کا شباب دیکھا ہے

خواب پورا بتا نہیں سکتا
آپ کو بے حجاب دیکھا ہے

منہ سے وُہ ایک حرف نہ بولے
چہرے پر اِضطراب دیکھا ہے

حُسن اور عشق کی لڑائی میں
حُسن کو کامیاب دیکھا ہے

سخت حیرت سے مرنے والے نے
محتسب کا حساب دیکھا ہے

کشتی کے آخری مسافر نے
ناخدا ، آب آب دیکھا ہے

اُس کو ’’اُس جیسا‘‘ مل گیا شاید
آج اُسے لاجواب دیکھا ہے

کر لئے ہاتھ زَخمی ، جس نے بھی
قیس کا ’’اِنتخاب‘‘ دیکھا ہے

#شہزادقیس
.
****************************************

Table of Contents

****************************************


****************************************

پیام بھیجا ’’ وَہیں ! آج شام ‘‘ زِندہ باد

****************************************
پیام بھیجا ’’ وَہیں ! آج شام ‘‘ زِندہ باد
تری کنیز کی جے ہو ، غلام زِندہ باد

وُہ آئے گھر مرے اُردُو اَدَب سمجھنے کو
پڑا ہے حُسن کو شاعر سے کام زِندہ باد

خدا بھلا کرے غالب کے خشک شعروں کا
حسین کرتے ہیں مجھ کو سلام زِندہ باد

معاوِضے میں جو اِک بال ڈَٹ کے مانگ لیا
وُہ ہنس کے بولے ، بس اِتنے سے دام ؟ زِندہ باد

جو ’’ پڑھ رہی ہے ‘‘ اُسے نصف آنکھ ماری ہے
اَگر وُہ ہنس پڑے تو یہ کلام زِندہ باد

نظر جھکا کے ہمیں سادہ پانی پیش کیا
ذِہین ساقی ترا اِنتظام زِندہ باد

تمام لذتوں کے دام ہو گئے دُگنے
فقیہِ شہر تری روک تھام زِندہ باد

ہمیشہ چنتے ہیں پہلے سے کچھ برا حاکم
ترقی کرنے پہ اَپنی عوام زِندہ باد

بچا لو ڈُوبتے کافر کو دِل کے فتوے پر
حرام بھی ہُوا تو یہ حرام زِندہ باد

زَمانے بھر کے غمو ! آؤ مجھ پہ ٹُوٹ پڑو
شرابِ عشق ترا ایک جام زِندہ باد

ہُوئی ہے حشر تلک لیلیٰ ، قیسؔ سے منسوب
جنونی شخص ترا اِنتقام زِندہ باد

#شہزادقیس
.
****************************************

Table of Contents

****************************************


****************************************

حُسن کے دِل پہ وار کرتے ہیں

****************************************
حُسن کے دِل پہ وار کرتے ہیں
شعر سے ہم شکار کرتے ہیں

عکس ، لب خندِ یار کا لے کر
کام اِک بار بار کرتے ہیں

آئینہ دیکھتے نہیں لڑکے
مہ جبینوں سے پیار کرتے ہیں

رَقصِ بسمل ہو کھیل جن کے لیے
تیر کب آر پار کرتے ہیں

جو کتب پر نشاں لگاتے نہیں
شاعری ، زَہر مار کرتے ہیں

حشر پر اُن کو اِعتبار نہیں
حشر تک جو اُدھار کرتے ہیں

عقل والوں کو دِل کے حملے سے
مَن چلے ہوشیار کرتے ہیں

گن کے دو گے تو حوریں رہنے دو
پیار ہم بے شمار کرتے ہیں

جو فرشتوں کا اِنتظار کریں
عمر بھر اِنتظار کرتے ہیں

عقل ہے گر اِسی چلن کا نام
ہم جُنوں اِختیار کرتے ہیں

بے بَصر پر نوشتۂ دیوار
قیسؔ ہم آشکار کرتے ہیں

#شہزادقیس
.
****************************************

Table of Contents

****************************************


****************************************

یہ شعر پڑھ کے کئی لوگ مسکرانے لگے

****************************************
یہ شعر پڑھ کے کئی لوگ مسکرانے لگے
وُہ عکس چومتے ہی اُس کو منہ چڑانے لگے

ہَوا نے اُنگلی سی پھیری ، حسین ہونٹوں پر
ذِرا سا کانپ کے وُہ نچلا لب چبانے لگے

جنابِ شیخ کی نقشہ گری کے کیا کہنے
بغیر دیکھے ہمیں جنتیں دِکھانے لگے

جب اُس حسین نے تختہ سیاہ صاف کیا
تو لڑکے کاپیوں سے بھی سبق مٹانے لگے

کسی کی چال پہ اِک بار غور کرنے سے
بڑے کمال کے ہم زائچے بنانے لگے

’’ بہت ہی حبس ہے ‘‘ کہہ کر نقاب اُتار دِیا
شب اَپنے ہونے کا کھُل کر یقیں دِلانے لگے

جنابِ من اِنہیں روکو یہ بات ٹھیک نہیں
تمہارے خواب تو اَب دِن میں بھی ستانے لگے

یہ کہہ کے ’’ کہتے جو غالبؔ تو مان جاتے ہم ‘‘
ہمیں ہمارے ہی اُستاد سے جلانے لگے

خدا ہی جانے حقیقت میں ہے شکاری کون
گلے لگے ہوُئے دِل دِل میں مسکرانے لگے

جو دِل کی شکل کا کیک اُن کو کاٹنے کو ملا
چھری وُہ میری طرف دیکھ کر چلانے لگے

وُہ شرمسار ہُوئے کتنے قیسؔ کچھ نہ پوچھ
غزل جو میرؔ کی کہہ کر ، مری سنانے لگے

#شہزادقیس
.
****************************************

Table of Contents

****************************************


****************************************

نقاب اُٹھائے تو دُشمن سلام کر دے گا

****************************************
نقاب اُٹھائے تو دُشمن سلام کر دے گا
جمالِ یار محبت کو عام کر دے گا

یہ دُھوپ ، چھاؤں کے موسم ہیں اُس کی مٹھی میں
اَگر ضَروری لگا ، دِن میں شام کر دے گا

صنم کدہ وُہ دُعاؤں کے بعد کھولے گا
نماز پڑھ لے تو ’’مرنا‘‘ حرام کر دے گا

ہے کوہ قاف پہ اُس شوخ گُل کا ذِکر حرام
کہ ننھی پریوں کو یہ بے لگام کر دے گا

خدا کے واسطے ، اُمید کی حفاظت کر
خدا نے چاہا تو دُشمن بھی کام کر دے گا

طلسمِ مصر ہے اُس کے حسین ہاتھوں میں
جو وُہ بنائے تو چائے کو جام کر دے گا

نہ چھوڑ اِس قَدَر آزاد اَپنی آنکھوں کو
یہ کام تجھ کو کسی کا غلام کر دے گا

تمام رات فقط چاند دیکھتے رہنا
تمہارا کام کسی دِن تمام کر دے گا

غزل ، صنم پہ بڑے لکھتے ہیں مگر مجنوں!
کتاب لکھے گا ، لیلیٰ کے نام کر دے گا

اُداس ہو تو غزل اور بھی سناؤں حُضور؟
جو مسکراؤ تو قیس اِختتام کر دے گا

#شہزادقیس
.
****************************************

Table of Contents

****************************************


****************************************

کہا دَھڑکن ، جگر ، سانسوں کو تُم سے پیار ہے لیلیٰ

****************************************
کہا دَھڑکن ، جگر ، سانسوں کو تُم سے پیار ہے لیلیٰ
کہا اِن ’’ اَدبی دَعوؤں ‘‘ سے بہت بیزار ہے لیلیٰ

کہا سُنیے ! ہمارا دِل یہیں پر آج رَکھا تھا
کہا لو کیا تمہارے دِل کی ’’ ٹھیکے دار ‘‘ ہے لیلیٰ

کہا مجنوں کی چاہت نے تمہیں لیلیٰ بنا ڈالا
کہا مجنوں جُنونی کی تو خود معمار ہے لیلیٰ

کہا اِن زاہدوں کو ’’ کچھ ‘‘ رِعایَت عشق میں دیجے
کہا حوروں کا نہ سوچیں تو ’’ کچھ ‘‘ تیار ہے لیلیٰ

کہا تنہا ملو ناں ، ’’ صرف ‘‘ کچھ غزلیں سنانی ہیں
کہا ہم سب سمجھتے ہیں ، بہت ہشیار ہے لیلیٰ

کہا کوہِ ہَمالہ میں رَواں کر دُوں جو جُوئے شیر !
کہا وُہ شرطِ شیریں تھی ، کہیں دُشوار ہے لیلیٰ

کہا شمع ، پتنگے ، قیسؔ ، لیلیٰ میں ستم گر کون ؟
کہا شمع بھی نوری ، نور کا مینار ہے لیلیٰ

#شہزادقیس
.
****************************************

Table of Contents

****************************************


****************************************

کہا میرا پسندیدہ عدد تو ’’ چار ‘‘ ہے لیلیٰ

****************************************
کہا میرا پسندیدہ عدد تو ’’ چار ‘‘ ہے لیلیٰ
کہا تم جیسے بھنوروں کے لیے تلوار ہے لیلیٰ

کہا تکیہ ، صراحی ، پھول ، دِل میں مشترک ہے کیا
کہا نیّت تمہاری جس کی واقف کار ہے لیلیٰ

کہا مجنوں نگاہیں پھیر لے تو کیا کریں گی جی ؟
کہا مجنوں نہ کر پائی تو پھر بے کار ہے لیلیٰ

کہا پر ملکۂ حُسنِ جہاں تو اور کوئی ہے
کہا پردہ نشیں ہیں ، وَرنہ تو سردار ہے لیلیٰ

کہا یہ ہجر کی راتیں مجھے کیوں بخش دیں صاحب
کہا ’’ شاعر بنانے کو ‘‘ ، بہت فنکار ہے لیلیٰ

کہا گھر نہ سہی اَپنی گلی کا تو اِشارہ دیں
کہا باتوں میں نہ آئے بہت ہشیار ہے لیلیٰ

کہا لیلیٰ کا ’’ لیلیٰ قیسؔ ‘‘ بننا کیسے ممکن ہے
کہا گر ’’ چار ‘‘ سے باز آؤ تو تیار ہے لیلیٰ

#شہزادقیس
.
****************************************

Table of Contents

****************************************


****************************************

شرارت کے صحیفے کا ، غَضب کردار ہے لیلیٰ

****************************************
شرارت کے صحیفے کا ، غَضب کردار ہے لیلیٰ
’’نرے‘‘ شمشیر زَن! ، معصومیت کا وار ہے لیلیٰ

یہ جب لہرا کے چلتی ہے تو کلیاں رَقص کرتی ہیں
غُرورِ حُسن کے جبروت کا اِظہار ہے لیلیٰ

گھٹا ، گیسو ، دَھنک ، اَبرُو ، گُہر ، آنسو ، کلی ، خوشبو
حیا کی پاک جمنا ، رُوح کا سنسار ہے لیلیٰ

ہنسے رِم جھِم ، چلے چھم چھم ، کہے ہر دَم ، سنے کم کم
سُروں کی راجدھانی ، جھرنوں کی جھنکار ہے لیلیٰ

کوئی ’’بھنورا‘‘ گیا خوشبو چُرانے ، ہوش کھو بیٹھا
کہے ، میں گُل سمجھتا تھا مگر گُل زار ہے لیلیٰ

چھری خربوزے پہ گرنے کی ضربُ المثل دے بیٹھا
چھری خود کو سمجھ کر لڑنے کو تیار ہے لیلیٰ

حلف شمع اُٹھاتی ہے ، طوافِ لیلوی کر کے
پتنگوں کے فنا ہونے میں حصے دار ہے لیلیٰ

جھلک پوری دِکھا دے ، تو سبھی دیوانے مر جائیں
خُدا خوفی کے جذبے سے ، بہت سرشار ہے لیلیٰ

خبر ہے اِس کو دیوانہ ، خرد کو کھو بھی سکتا ہے
سَرِ بازار ملتی ہے ، بہت ہُشیار ہے لیلیٰ

صبا کُوئے وَفا سے ، قیس کا پیغام نہ لائی
یہ تتلی ’’سب‘‘ سمجھتی ہے ، کہ کیوں بیمار ہے لیلیٰ

#شہزادقیس
.
****************************************

Table of Contents

****************************************


****************************************

اُجالا پنکھڑی کا ، دیپ کی مہکار ہے لیلیٰ

****************************************
اُجالا پنکھڑی کا ، دیپ کی مہکار ہے لیلیٰ
کرشماتی چمن آرائی کا گلزار ہے لیلیٰ

کلی میں گھس کے سوتی ہے ، محبت کی مہارانی
اُٹھے تو پھول کھلتے ہیں ، غضب گلنار ہے لیلیٰ

صبا ، زُلفوں میں اُنگلی پھیر کر ، کہتی ہے ’’اُٹھیں بھی‘‘
رُخِ دِلکش دُھلے شبنم سے تو تیار ہے لیلیٰ

اُسے بیدار ہوتا دیکھ کر جھرنے نے دُھن بدلی
سریلی فاختہ کُوکی ، تمہی سے پیار ہے لیلیٰ

اُٹھا کر خوش نما تتلی ، سجا لی زُلفِ عنبر میں
کلی ہونٹوں پہ پھیری ، واہ کیا سنگھار ہے لیلیٰ!

گلابی گال یوں خوشبو نے چومے ہیں محبت سے
حیا کی لال لالی سے دَھنک رُخسار ہے لیلیٰ

پتنگے گر خبر لاتے تو اُن کے پر نہ جل جاتے!
مجھے تتلی نے بتلایا کہ خوشبودار ہے لیلیٰ

یہ جگنو نغمہ گر ہیں کان میں یا گوشوارے ہیں
یہ دِل کا نُور ہے یا چاندنی کا ہار ہے لیلیٰ

کنیزیں تتلیاں اِس کی ، نگہبانی کو غنچے ہیں
رُکوع میں جھک گئے ہیں گُل ، سَرِ دَربار ہے لیلیٰ

غزل کے پیراہن میں قیس نے چٹکی بھری دِل پر
غرور و آہ پرور مستی سے سرشار ہے لیلیٰ

#شہزادقیس
.
****************************************

Table of Contents

****************************************


****************************************

غزل ہے صرف کوشش اور اِک شہکار ہے لیلیٰ

****************************************
غزل ہے صرف کوشش اور اِک شہکار ہے لیلیٰ
کمالِ حُسنِ تخلیقات کا سنسار ہے لیلیٰ

چراغِ مُصحفِ رُخ ، معجزہ ہے حُسنِ حیرت کا
اَلف لیلیٰ ہو کوئی ، مرکزی کردار ہے لیلیٰ

ہزاروں تتلیاں لیلیٰ پکڑنے پیچھے چل نکلیں
ذِرا سا دُور سے ، چلتا ہُوا گلزار ہے لیلیٰ

جو مل بیٹھے یہ غنچوں میں تو اُن کا حُسن بڑھ جائے
شِگُوفے جاں چھڑکتے ہیں ، چمن کا پیار ہے لیلیٰ

ذِرا سی قوس رُخ کی رِہ گئی پردے سے شب باہر
ہلالِ عید بولا چاند کا دیدار ہے لیلیٰ

سنا ہے غنچے کو بوسے سے اِک دِن روک نہ پائی
سنا ہے اُس گھڑی سے ، محوِ اَستغفار ہے لیلیٰ

چلے تو نرم جھٹکا ہر کلی کے دِل کو لگتا ہے
رُکے تو جل پری کو حُسن کا مینار ہے لیلیٰ

چرا لی پھول نے خوشبو ، حنا کا حُسن تتلی نے
چمن کی دِلنشیں دَھڑکن کی پالن ہار ہے لیلیٰ

قصیدہ عمر بھر لکھوں ترا تو کچھ بھی نہ لکھا
کہ تو لاکھوں جنم تعریف کی حق دار ہے لیلیٰ

غُرورِ حُسن ہے اِس شعر پڑھنے والی کو جو قیس
تو شاید زُعم ہو کہ میری تو سردار ہے لیلیٰ

#شہزادقیس
.
****************************************

Table of Contents

****************************************


****************************************

کسی خونی قبیلے کی سپہ سالار ہے لیلیٰ

****************************************
کسی خونی قبیلے کی سپہ سالار ہے لیلیٰ
کبھی دَشنہ ، کبھی خنجر ، کبھی تلوار ہے لیلیٰ

بدن پہ وُہ غضب ڈھاتا ہے ، یہ جذبات کی قاتل
ستم کے بادشہ کی ، حاشیہ بردار ہے لیلیٰ

یہ کشتِ زَعفرانی ہے ، فقط آغازِ اُلفت میں
جو دِل دے دو تو پھر دِن رات کشتِ زار ہے لیلیٰ

کبھی اِس نے وَفا کی ہو تو پھر اِنسان سوچے بھی
رُخِ معصوم نہ دیکھ ، آخری عیار ہے لیلیٰ

ترا کردار ہی ، گفتار کا ، حامی نہیں ظلمی!
تُو لاکھ اِقرارِ اُلفت کر ، ہمیں اِنکار ہے لیلیٰ

تری آنکھوں کا نیلا پن ، یہ تیرا ماتمی جُوبَن
جو تجھ پہ مر مٹے ، مجنوں ، یہ کیا کردار ہے لیلیٰ؟

کوئی ہَدیہ بہ مسجد تو کوئی مے خانے کو بخشا
شکایت پر کہے قاضی سے ، خود مختار ہے لیلیٰ

ہُوئی کھیتی جواں دِل کی ، گرانے آ گئی بجلی
چمک پہ نہ مرو صاحب! ، چمکتی دھار ہے لیلیٰ

ستم کی ملکہ ، ظلمت گر ، کِرائے کی کوئی قاتل
بزورِ حُسن قبضہ گر ، بہت فنکار ہے لیلیٰ

اَگر تم نہ ملیں تو اِس غزل کو ’’ٹھیک‘‘ سے پڑھ لو!
اَگر ہو قیس کی تو ، توبہ اَستغفار ہے لیلیٰ

#شہزادقیس
.
****************************************

Table of Contents

****************************************


****************************************

خدا کا شکر ہے کہ دِلبر و دِلدار ہے لیلیٰ

****************************************
خدا کا شکر ہے کہ دِلبر و دِلدار ہے لیلیٰ
تمہارا شکر ہے کہ تم کو مجھ سے پیار ہے لیلیٰ

مرا جینا ، مرا مرنا تری زُلفوں کے سائے میں
مری ہم دَم ، مری مرشِد ، مری سالار ہے لیلیٰ

تری چاہت نے دَھڑکن دِل کو بخشی ، جانِ محبوبی
جہاں پر ہُوں ، میں جو کچھ ہُوں ، فقط معمار ہے لیلیٰ

بھنور کے قلب میں ساحل ، وَفا کی کِشت کا حاصل!
زَمینِ شوق تپتا دَشت ، لالہ زار ہے لیلیٰ

بچھڑ جا شوق سے لیکن قسم جینے کی تو نہ دے
ترے بن ایک دَھڑکن ، حشر سے دُشوار ہے لیلیٰ

زَمینی برق ، برقِ حُسن ، حُسنِ شوق ، شوقِ غم
غمِ خوش رَنگ ، رَنگِ گُل ، گُلِ گُلنار ہے لیلیٰ

کوئی دیوانے کے ہاتھوں میں اَپنا ہاتھ کیسے دے!
وُہ خود غدار ہیں ، کہتے ہیں جو غدار ہے لیلیٰ

خدا نے بخش دی ہیں تجھ کو اِتنی معنوی نظریں
زَمانہ حشر تک ’’اِجمال‘‘ کو دَرکار ہے لیلیٰ

فِرُومایہ مرے اَلفاظ ، تیرا حُسن سرمایہ
مری سوچیں بمشکل پھول ، تُو گلزار ہے لیلیٰ

اے جانِ قیس یہ شہرت ترے پاؤں کا صدقہ ہے
مجھے شاعر بنانے میں ترا کردار ہے لیلیٰ

#شہزادقیس
.
****************************************

Table of Contents

****************************************


****************************************

قلم کو بابِ تمنا پہ دَھر کے دیکھتے ہیں

****************************************
قلم کو بابِ تمنا پہ دَھر کے دیکھتے ہیں
خُمِ فراز سے اِک جام بھر کے دیکھتے ہیں

سفر کے تاروں نے کیا کُوچ کا بتانا تھا
کہ وُہ تو پیروں کو رَشکِ قمر کے دیکھتے ہیں

ہنر ملا ہے جنہیں شاعری کا ، اُن کا نصیب
کہ ہم تو معجزے خونِ جگر کے دیکھتے ہیں

ہر ایک ذات میں اُس کی کوئی نشانی ہے
کرشمے حُسن میں رَب کے ہُنر کے دیکھتے ہیں

سنا ہے اُس نے یوں اَنگڑائی لی کہ حسرت سے
پری جمال ، کمال اِک بشر کے دیکھتے ہیں

سنا ہے جب وُہ کبھی نچلا لب چباتے ہیں
تو پھول پنکھڑی کو دُہرا کر کے دیکھتے ہیں

سنا ہے کروٹیں گنتا ہے چاند ، راتوں کو
کئی ستارے تو چھت پر اُتر کے دیکھتے ہیں

سنا ہے چال پہ ہے آنکھ ، راج ہنسوں کی
غزال کُوچۂ جاں سے گزر کے دیکھتے ہیں

سنا ہے بوند جو پانی کی لب کو چھُو کے گری
شراب خانے اُسے آہ بھر کے دیکھتے ہیں

سنا ہے رُوپ کا دَرپن ہے رَقص کرتا کنول
حسین غنچے اُسے بن سنور کے دیکھتے ہیں

سنا ہے عید کا چاند اُن کی راہ تکتا ہے
خوشی کے دیپ ، قدم خوش نظر کے دیکھتے ہیں

سنا ہے بادَلوں پہ جب وُہ پاؤں دَھرتے ہیں
تو اَبر کو تو سمندر بپھر کے دیکھتے ہیں

سنا ہے بس سے ہو باہر اَگر مسیحا کے
تو خاک قدموں کی تجویز کر کے دیکھتے ہیں

سنا ہے زینہ اُترتا ہے یوں وُہ مست غزال
کہ حرف چٹکلے زِیر و زَبر کے دیکھتے ہیں

سنا ہے ایک تو چوری کی اِملی کھاتے ہیں
زَباں پہ لیموں کی پھر بوند دَھر کے دیکھتے ہیں

سنا ہے آئینے سے خاصے بے تَکلُفّ ہیں
سو ہم بھی دُوسری جانب اُتر کے دیکھتے ہیں

سنا ہے فاختہ کے با اَدب ترانے پر
شجر رُکوع میں بھی دَم خم کمر کے دیکھتے ہیں

سنا ہے جگنو کوئی زُلف میں رہا شب بھر
ستارے نخرے اَب اُس مفت بر کے دیکھتے ہیں

سنا ہے مورنی شاگردِ خاص ہے اُن کی
سو مور رَقص اُسی مست گر کے دیکھتے ہیں

سنا ہے جان کنی مشغلہ ہے ملکہ کا
اِسی بہانے ملاقات کر کے دیکھتے ہیں

سنا ہے دُھوپ میں بارِش ہے زُلف چہرے پر
خوشی سے اَبر اُسے ہر نگر کے دیکھتے ہیں

سنا ہے جل پری ، جلتی ہے اُن کے پیروں سے
گڑھے کو گالوں کے چکر بھنور کے دیکھتے ہیں

سنا ہے جب کبھی آزادۂ قبا ہو نگار
نظر جھکا کے قبا ، دیپ گھر کے دیکھتے ہیں

سنا ہے نُور کا ہالہ ہے بانکی نار پہ یوں
کہ دید خواہ تو بس اُس کو مر کے دیکھتے ہیں

سنا ہے چُوڑیوں سے دِل کے تار بجتے ہیں
سنا ہے گھنگھرو کو نغمے ٹھہر کے دیکھتے ہیں

حیا کی برق دَرخشاں ہے شوخ آنکھوں میں
جواہرات کرشمے گہر کے دیکھتے ہیں

سنا ہے مندروں میں اِس لیے نہیں جاتے
کہ بُت بھی سجدے ، مہا بُت کو کر کے دیکھتے ہیں

سنا ہے دِیویاں اُس کی کنیزِ اَدنیٰ ہیں
خزینے پاؤں تلے خشک و تر کے دیکھتے ہیں

بتوں کا واسطہ دے کر پجاری پہنچے ہُوئے
غبارِ راہ سے دامن کو بھر کے دیکھتے ہیں

سنا ہے شوخ ، خوشی سے جو کھلکھلا اُٹھے
طلائی جھرنے ہنسی کو ٹھہر کے دیکھتے ہیں

کلی پہ بیٹھی کسی تتلی پر جھکا ہے کوئی
اُجالے جلوے کسی بے خبر کے دیکھتے ہیں

پکار اُٹھتے ہیں یہ نقل ہے حنا کی مری
جو نقش غور سے تتلی کے پر کے دیکھتے ہیں

بدن کی چاندنی کو دُھوپ جب لگاتے ہیں
قمر مریخ کے ، ہالے کمر کے دیکھتے ہیں

سنا ہے خوشبو کے تالاب میں نہا دھو کر
نسیمِ صبح کو تن زیب کر کے دیکھتے ہیں

سنا ہے خواب اُنہیں اِس لئے نہیں آتے
کہ خواب سب ہی کسی اَعلیٰ تر کے دیکھتے ہیں

جو خواب دیکھتے بھی ہیں تو صرف شیش مَحَل
سو خود بھی جلوے رُخِ فتنہ گر کے دیکھتے ہیں

سنا ہے خوشبو کی بارِش ہے گُل بدن کا وُجود
گلاب راستے خوشبو کے گھر کے دیکھتے ہیں

لب اِتنے میٹھے کہ اَنگور اُن کو کھٹا کہیں
وُہ جب شراب کا اِک گھونٹ بھر کے دیکھتے ہیں

سنا ہے شہد کی بوندوں کے چند پروانے
گلاس پر لگی سرخی پہ مر کے دیکھتے ہیں

سنا ہے چاندنی سے وُہ حنا لگاتے ہیں
کلی چٹکنے کو پازیب کر کے دیکھتے ہیں

جو اُس کی ظاہری معصومیت پہ واریں دِل
تمام عمر ، ضرر ، بے ضرر کے دیکھتے ہیں

سنا ہے غنچے کو بوسہ دِیا ہے خوش لب نے
تو ہم بھی وعدے سے اَپنے مکر کے دیکھتے ہیں

سنا ہے بوسے سے یہ کہہ کے جاں چھڑاتے ہیں
نہیں نہیں اَبھی سب پھول گھر کے دیکھتے ہیں

سنا ہے سامری بعد اَز ہزار جل تو جلال
طلائی بچھڑے کا دِل دان کر کے دیکھتے ہیں

سنا ہے ہاتھ پہ جب تتلی وُہ بٹھاتے ہیں
عُقاب اَپنی قبائیں کُتر کے دیکھتے ہیں

حجاب زادی پہ خوشبو کا نُور اُترتا ہے
حریمِ حُسن ستارے سَحَر کے دیکھتے ہیں

وُہ جس پہ مرتا ہے آخر وُہ چیز کیا ہو گا
ہم اُس کے دِل میں کسی دِن اُتر کے دیکھتے ہیں

وُہ خواب ہے کہ فُسوں ، جن ، پری کہ جانِ جُنوں
سب اُس کے حُسن کو تھوڑا سا ڈَر کے دیکھتے ہیں

جلالِ حُسن پہ حیرت سے دَنگ اِہلِ سُخن
قلم زَمین پہ اِہلِ نظر کے دیکھتے ہیں

ہمیشہ زُعم سے اُس پر غزل شروع کی قیس !
ہمیشہ بے بسی پہ ختم کر کے دیکھتے ہیں

#شہزادقیس
.
****************************************

Table of Contents

****************************************

خوشبوؤں کے کنول جلاؤں گا

****************************************
خوشبوؤں کے کنول جلاؤں گا
سیج تو چاند پر سجاؤں گا

تُو شریکِ حیات بن جائے
پیار کی مملکت بناؤں گا

تھام لے ہاتھ میرا وعدہ ہے
تیری پازیب تک دَباؤں گا

تُو کرم ماں کے بھول جائے گی
میں ترے اِتنے ناز اُٹھاؤں گا

تیرے گُل رُخ کی تازگی کے لیے
شبنمی گیت گنگناؤں گا

خانقاہوں کے بعد تیرے لیے
مندروں میں دِئیے جلاؤں گا

مانگ تیری دَرخشاں رَکھنے کو
کہکشائیں بھی توڑ لاؤں گا

دِل کی رانی ہے ، نوکرانی نہیں
اَپنے گھر والوں کو بتاؤں گا

تیرے گھر والے روز آئیں گے
اُن سے یوں رابطہ بڑھاؤں گا

گھر سے میں سیدھا جاؤں گا دَفتر
اور دَفتر سے گھر ہی آؤں گا

یاروں کے طعنے بے اَثر ہوں گے
میں ترے ساتھ کھانا کھاؤں گا

چاندنی شب میں من پسند غذا
لقمہ لقمہ تجھے کھِلاؤں گا

کاسۂ آب پہلے دُوں گا تجھے
پیاس میں بعد میں بجھاؤں گا

بھول جائے گی گھر کی اُکتاہٹ
شب تجھے اِس قَدَر گھماؤں گا

ویسے بھر آئے دِل تو رو لینا
سوچ بھی نہ کہ میں ستاؤں گا

گر خطا تجھ سے کوئی ہو بھی گئی
دیکھ کر صرف مسکراؤں گا

چند لمحے خفا ہُوئے بھی اَگر
وعدہ ہے پہلے میں مناؤں گا

رات بارہ بجے تُو سوئے اَگر
دِن کے بارہ بجے جگاؤں گا

جل گئی ہنڈیا گر کبھی تجھ سے
اَگلے دِن کھانا میں بناؤں گا

بیٹیاں ہوں یا بیٹے رَب کی عطا
دونوں کو پلکوں پر بٹھاؤں گا

کان پہ تکیہ رَکھ کے سو جانا
میرے بچے ہیں ، میں سلاؤں گا

شکوہ تجھ سے کروں گا خلوت میں
سامنے سب کے گُن میں گاؤں گا

فیصلے ہم کریں گے مل جل کر
حکمِ حاکم نہیں چلاؤں گا

زَن مریدی کا طعنہ جوتی پر
مرد بن کر وَفا نبھاؤں گا

ایک دِن تیرا ایک دِن میرا
ٹی وی پر قبضہ نہ جماؤں گا

تیرا کیا واسطہ سیاست سے
بور خبریں نہیں سناؤں گا

مجھ کو حیرت ہے تُو نے سوچا کیوں
شادی کا دِن میں! بھول جاؤں گا؟

جگ منائے گا عید ، دیکھ کے چاند
میں تجھے دیکھ کر مناؤں گا

بن کہے تیری بات سمجھوں گا
بن کہے دَرد جان جاؤں گا

علم ، طاقت ، کمائی ، عقل ، جمال
ایک بھی رُعب نہ جماؤں گا

جب کوئی کھیل کھیلیں گے ہم تم
سوچ کر کچھ میں ہار جاؤں گا

اَپنی ہر کامیابی کا سہرا
میں ترے سر پہ ہی سجاؤں گا

گر کبھی ایک کو بچانا ہُوا
ڈُوب کر بھی تجھے بچاؤں گا

میں فقط تجھ پہ آنکھ رَکھوں گا
میں فقط تجھ سے دِل لگاؤں گا

زَخم اور تلخی کے سوا جاناں
تجھ سے میں کچھ نہیں چھپاؤں گا

حُسن کے ڈَھلنے کی تُو فکر نہ کر
آخری سانس تک نبھاؤں گا

ہجر تقدیر نے اَگر لکھا
صرف ہلکا سا یاد آؤں گا

میری حوریں کنیز ہوں گی تری
بن ترے میں اِرم نہ جاؤں گا

تُو فقط پڑھ کے اِتنی خوش نہ ہو
میں تجھے کر کے یہ دِکھاؤں گا

اور کیا چاہیے ثبوتِ خلوص
قیس کی ہر غزل سناؤں گا

#شہزادقیس
.

****************************************

سودائی:: اِس دَرجہ بے خودی میں مجھے مل گیا کمال

****************************************
سودائی:: اِس دَرجہ بے خودی میں مجھے مل گیا کمال
میں سال پوچھنے لگا تاریخ کی جگہ
#شہزادقیس
.
****************************************

Table of Contents

****************************************


****************************************

اِنتخاب:: وُہ عام لوگوں پہ نظرِ کرم نہیں کرتے

****************************************
اِنتخاب:: وُہ عام لوگوں پہ نظرِ کرم نہیں کرتے
کہ جس کو دیکھ لیں وُہ عام کب رہا صاحب

#شہزادقیس
.
****************************************

Table of Contents

****************************************


****************************************

سخاوت:: میں نے ڈَر ڈَر کے اِک سوال کیا

****************************************
سخاوت:: میں نے ڈَر ڈَر کے اِک سوال کیا
اُس نے بانہوں کو ہنس کے کھول دِیا

#شہزادقیس
.
****************************************

Table of Contents

****************************************


****************************************

تشخیص:: یہ طبیبوں کے بس کی بات نہیں

****************************************
تشخیص:: یہ طبیبوں کے بس کی بات نہیں
آپ کا مسئلہ محبت ہے

#شہزادقیس
.
****************************************

Table of Contents

****************************************


****************************************

ہئیر ڈَریسر:: سُخن وَری سے تھا بہتر ، تراشتے گیسو

****************************************
ہئیر ڈَریسر:: سُخن وَری سے تھا بہتر ، تراشتے گیسو
وُہ چل کے آتے بھی خود ، سر جھکا کے بیٹھتے بھی

#شہزادقیس
.
****************************************

Table of Contents

****************************************


****************************************

کرم:: تُو اَپنی بارگاہ میں مُجھ کو بُلند رَکھ

****************************************
کرم:: تُو اَپنی بارگاہ میں مُجھ کو بُلند رَکھ
دُنیا گرائے نظروں سے یا آسمان سے

#شہزادقیس
.
****************************************

Table of Contents

****************************************


****************************************

محور:: عشق نے آسان کر دی کُل حیات

****************************************
محور:: عشق نے آسان کر دی کُل حیات
اَب فقط خوش رَکھنا ہے اِک شخص کو

#شہزادقیس
.
****************************************

Table of Contents

****************************************


****************************************

ساقی:: غم زدے ، ہاتھ چومتے ہیں مرا

****************************************
ساقی:: غم زدے ، ہاتھ چومتے ہیں مرا
بھولنے کا ہنر سکھاتا ہوں

#شہزادقیس
.
****************************************

Table of Contents

****************************************


****************************************

وَجہ:: عاجزی میری خاص شہرت تھی

****************************************
وَجہ:: عاجزی میری خاص شہرت تھی
پیار نے اُس کے کر دِیا مغرور

#شہزادقیس
.
****************************************

Table of Contents

****************************************


****************************************

جرأت:: جرأت سے اَپنی ذات کا اِظہار کر کے دیکھ

****************************************
جرأت:: جرأت سے اَپنی ذات کا اِظہار کر کے دیکھ
آ میرے مشورے پہ کبھی پیار کر کے دیکھ

#شہزادقیس
.
****************************************

Table of Contents

****************************************


****************************************

زاوِئیے:: حُسن کے زاوِئیے خدا کی پناہ

****************************************
زاوِئیے:: حُسن کے زاوِئیے خدا کی پناہ
آہ! وُہ شعر جو چھُپانے پڑے
#شہزادقیس
.

****************************************

۔ اختتام ۔ مجموعہ کلام "لیلیٰ" ۔

****************************************
۔ اختتام ۔ مجموعہ کلام "لیلیٰ" ۔
سدا خوش رہیے ۔ شہزادقیس