**************************************** ((Notice)) Updated On: 1/1/2019 10:23:26 PM Release Date: 8/13/2017 2:40:04 PM **************************************** **************************************** ((Begin Text)) **************************************** **************************************** شہزادقیس کی جانب سے خوش آمدید **************************************** شہزادقیس کی جانب سے خوش آمدید مجموعہ کلام "#وہ_اتنا_دلکش_ہے" میں شامل اشعار **************************************** Table of Contents **************************************** **************************************** اِنتساب **************************************** اِنتساب پھر بھی لیلیٰ کے نام **************************************** Table of Contents **************************************** **************************************** اَدائیں حشر جگائیں ، وُہ اِتنا دِلکش ہے **************************************** اَدائیں حشر جگائیں ، وُہ اِتنا دِلکش ہے خیال حرف نہ پائیں ، وُہ اِتنا دِلکش ہے بہشتی غنچوں میں گوندھا گیا صراحی بدن گلاب خوشبو چرائیں ، وُہ اِتنا دِلکش ہے بدن بنانے کو کرنوں کا سانچہ خلق ہُوا خمیر ، خُم سے اُٹھائیں ، وُہ اِتنا دِلکش ہے قدم ، اِرم میں دَھرے ، خوش قدم تو حور و غلام چراغ گھی کے جلائیں ، وُہ اِتنا دِلکش ہے حلال ہوتی ہے ’’ پہلی نظر ‘‘ تو حشر تلک حرام ہو جو ہٹائیں ، وُہ اِتنا دِلکش ہے گُل عندلیب کو ٹھکرا دے ، بھنورے پھولوں کو پتنگے شمع بجھائیں ، وُہ اِتنا دِلکش ہے غُبارِ راہ ہُوا غازہ اَپسراؤں کا نہا نہا کے لگائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** چمن کو جائے تو دَس لاکھ نرگسی غنچے **************************************** چمن کو جائے تو دَس لاکھ نرگسی غنچے زَمیں پہ پلکیں بچھائیں ، وُہ اِتنا دِلکش ہے وُہ پنکھڑی پہ اَگر چلتے چلتے تھک جائے تو پریاں پیر دَبائیں ، وُہ اِتنا دِلکش ہے جو آنکھ کھلتی ہے غنچوں کی شوخ ہاتھوں پر تو اَمی کہہ کے بُلائیں ، وُہ اِتنا دِلکش ہے جہاں پہ ٹھہرے وُہ خوشبو کی جھیل بن جائے گلاب ڈُوبتے جائیں ، وُہ اِتنا دِلکش ہے ہَوا میں بوسہ اُچھالے تو پھول کھِل اُٹھیں پرندے نغمے سنائیں ، وُہ اِتنا دِلکش ہے وُہ عید ملنے جو غنچوں میں آئے ، پھول کہیں نمازِ خوشبو پڑھائیں ، وُہ اِتنا دِلکش ہے وُہ چومے غنچوں کو شفقت سے پر ’’ چھپے رُستم ‘‘ لبوں سے شہد چرائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** جو حُسن جسم سے چھَلکا ، اُسی سے پھول بنے **************************************** جو حُسن جسم سے چھَلکا ، اُسی سے پھول بنے ذِرا حساب لگائیں ، وُہ اِتنا دِلکش ہے ذِرا سا بوسے پہ مائل ہُوا تو سارے گلاب نفی میں سر کو ہلائیں ، وُہ اِتنا دِلکش ہے گلابی اِتنا ہے کہ اُس کو شاہ سُرخ گُلاب ’’اَبُو گُلاب‘‘ بلائیں ، وُہ اِتنا دِلکش ہے مہکتے پھولوں کی حسرت ہے زُلف مل جائے تعلقات لڑائیں ، وُہ اِتنا دِلکش ہے کہا جو مالی سے گُل دو جو اُس کے لائق ہو تو بولا ہوش میں آئیں ، وُہ اِتنا دِلکش ہے چمن سے ہو کے چلا جائے ، باقی بچتی ہیں بہت اُداس ہَوائیں ، وُہ اِتنا دِلکش ہے گلی سے رات کو مِرّیخ کے وَزیرِ معاش اُتارے گجرے چرائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** یہ شوخ تتلیاں ، بارِش میں اُس کو دیکھیں تو **************************************** یہ شوخ تتلیاں ، بارِش میں اُس کو دیکھیں تو اُکھاڑ پھینکیں قبائیں ، وُہ اِتنا دِلکش ہے یہ شوخ تتلیاں ، سانسوں کی خوشبو پا لیں اَگر تو پھول ، بھول ہی جائیں ، وُہ اِتنا دِلکش ہے یہ شوخ تتلیاں ، شبنم سے خود کو پاک کریں پھر اُس کا ذِکر سنائیں ، وُہ اِتنا دِلکش ہے یہ شوخ تتلیاں ، نقشِ قدم جہاں پائیں دُعا کو ہاتھ اُٹھائیں ، وُہ اِتنا دِلکش ہے یہ شوخ تتلیاں ، تن کی تراش دیکھیں تو پروں پہ چاقو چلائیں ، وُہ اِتنا دِلکش ہے یہ شوخ تتلیاں رَنگِ حنا کی تصویریں گھروں میں اَپنے سجائیں ، وُہ اِتنا دِلکش ہے یہ شوخ تتلیاں ، اَنگڑائی اُس کی دیکھیں تو سر اَپنا پیٹتی جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** تمام آئینے حیرت میں غرق سوچتے ہیں **************************************** تمام آئینے حیرت میں غرق سوچتے ہیں اُسے یہ کیسے بتائیں ، وُہ اِتنا دِلکش ہے جن آئینوں نے اُسے دیکھا اُن کو پتھر بھی بہت اَدَب سے بُلائیں ، وُہ اِتنا دِلکش ہے جو پورا عکس بنانے کا سوچیں آئینے تو چھَن سے ٹوٹتے جائیں ، وُہ اِتنا دِلکش ہے بہت سے آئینے آپس میں اِتحاد کریں تو نصف عکس بنائیں ، وُہ اِتنا دِلکش ہے جو پہنچے آئینہ خانے سہیلیوں کے ساتھ تو بس اُسی کو دِکھائیں ، وُہ اِتنا دِلکش ہے جو اُس کے بعد کوئی ، آئینہ گھر آئے تو مذاق مل کے اُڑائیں ، وُہ اِتنا دِلکش ہے جن آئینوں نے اُسے دیکھا ہو وُہ جامِ جم سے ہاتھ تک نہ ملائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** رُکے تو وَقت ٹھہر جائے ، نبض روکے سانس **************************************** رُکے تو وَقت ٹھہر جائے ، نبض روکے سانس پرندے پر نہ ہلائیں ، وُہ اِتنا دِلکش ہے گنے تو تتلیوں میں خود کو بھول کر نہ گنے گلاب یاد دِلائیں ، وُہ اِتنا دِلکش ہے چنے گلاب تو لگتا ہے پھول مل جل کر مہکتی فوج بنائیں ، وُہ اِتنا دِلکش ہے ڈَرے تو اَپنی شرارت پہ ہنستے بادَل کو ہَوائیں ڈانٹ پلائیں ، وُہ اِتنا دِلکش ہے سجے تو سجدے میں خوشبو ، دَھنک کے ساتھ گرے خیال سر کو کھجائیں ، وُہ اِتنا دِلکش ہے ہنسے تو زَرد رُتوں میں گلاب کھِل جائیں بہاریں لوٹ کے آئیں ، وُہ اِتنا دِلکش ہے جھکے تو پھول نگاہوں پہ پنکھڑی رَکھ لیں گھٹائیں ، دُھوپ گھٹائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** مقابلے میں جو حُسنِ جہاں کے حصہ لے **************************************** مقابلے میں جو حُسنِ جہاں کے حصہ لے مقابلہ نہ کرائیں ، وُہ اِتنا دِلکش ہے اَگر مقابلہ ہو بھی تو پہلے تینوں مَقام اُسی کے حصے میں آئیں ، وُہ اِتنا دِلکش ہے زَمانے بھر کی حسین عورتیں ہَوا میں بلند! ترازُو ہلنے نہ پائیں ، وُہ اِتنا دِلکش ہے جو اُس کے سامنے بن ٹھن کے حُسن دِکھلائیں تمسخر اَپنا اُڑائیں ، وُہ اِتنا دِلکش ہے فخر سے سابقہ ملکائے حُسن کہنے لگی ہم اُس کے آگے ہیں گائیں ، وُہ اِتنا دِلکش ہے کسی کو اُس سے حسد ہو یہ غیر ممکن ہے کہ خود سا کب اُسے پائیں ، وُہ اِتنا دِلکش ہے وُہ اَوّل آ کے بھی بے تاج ملکہ کہلائی کہ تاج اَدنیٰ ہی پائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** صنم کدے میں جو پہنچے تو چند پہنچے صنم **************************************** صنم کدے میں جو پہنچے تو چند پہنچے صنم دُعا کو ہاتھ اُٹھائیں ، وُہ اِتنا دِلکش ہے صنم تراش فقط اُس کی باتیں سن سن کر صنم تراشتے جائیں ، وُہ اِتنا دِلکش ہے بتوں کو اُس کی کچھ آشیر باد ہو گی ضَرور جبھی تو سجدے کرائیں ، وُہ اِتنا دِلکش ہے جو مڑ کے دیکھے تو ہو جائیں دیوتا پتھر ’’ نہیں ‘‘ بھی کہنے نہ پائیں ، وُہ اِتنا دِلکش ہے کُنواری دِیویاں شمعیں جلا کے ہاتھوں پر حیا کا رَقص دِکھائیں ، وُہ اِتنا دِلکش ہے وُہ گیت گاتا ہے کہ سُر کی راجدھانی میں کِرِشن بنسی بجائیں ، وُہ اِتنا دِلکش ہے بَلی چڑھانے کو شہزادِیاں بھی لائیں اَگر زِیادہ موزوں نہ پائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** وُہ جس کے آنے کی خوشبو منادی کرتی ہے **************************************** وُہ جس کے آنے کی خوشبو منادی کرتی ہے بِگُل گلاب بجائیں ، وُہ اِتنا دِلکش ہے وُہ جس کی روشنی میں راہ بھانپ کر جگنو جہاں کو راہ دِکھائیں ، وُہ اِتنا دِلکش ہے وُہ جس کی یاد سے سوچوں میں چاند کھِلتے ہیں وُہ جس کے گُن سبھی گائیں ، وُہ اِتنا دِلکش ہے وُہ جس کے ہونے سے ’’ مادہ پرست ‘‘ ہیں ہم تم وُہ جس کو پھول لُبھائیں ، وُہ اِتنا دِلکش ہے وُہ جس کی جلد کو چھونا ہے عید شبنم کی وُہ جس کو تارے ستائیں ، وُہ اِتنا دِلکش ہے وُہ جس کا ریشمی آنچل بہار کے فوجی عَلَم بنا کے اُٹھائیں ، وُہ اِتنا دِلکش ہے وُہ جس کی خوشبو کو خوشبو سلام کرتی ہے وُہ جس کو غنچے منائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** شَفَق کی سرخی نہیں ، سرخ سیب جیسے گال **************************************** شَفَق کی سرخی نہیں ، سرخ سیب جیسے گال اُفق میں آگ لگائیں ، وُہ اِتنا دِلکش ہے اُفق کے تارے نہیں ، اُس کو چوم کر جگنو ترقی پاتے ہی جائیں ، وُہ اِتنا دِلکش ہے یہ ماہتاب نہیں ، کرنیں چاند زادی کی شبابِ شب کو سجائیں ، وُہ اِتنا دِلکش ہے یہ مورنی نہیں ، گیسو شرابِ اَقدس کے ہَوا کو رَقص سکھائیں ، وُہ اِتنا دِلکش ہے سَحَر کا وَقت نہیں ، نصفِ شب سنہرے ہاتھ حجاب رُخ سے ہٹائیں ، وُہ اِتنا دِلکش ہے یہ قوسِ قُزح نہیں ، اَبرُو شوخ قاتل کے دَھنک پہ دھاک بٹھائیں ، وُہ اِتنا دِلکش ہے یہ شاعری نہیں حیرت کی اِنتہا میں لفظ وَرَق پہ پھیلتے جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** عقیق ، لولو و مرجان ، ہیرے ، لعلِ یمن **************************************** عقیق ، لولو و مرجان ، ہیرے ، لعلِ یمن اُسی میں سب نظر آئیں ، وُہ اتنا دلکش ہے حریر ، اَطلس و کمخواب ، پنکھڑی ، ریشم دَبا کے ہاتھ لگائیں ، وُہ اِتنا دِلکش ہے جواہرات کی قسمت بدل دے شوخ بدن ’’ شریر ‘‘ چومتے جائیں ، وُہ اِتنا دِلکش ہے ہم اُس کے سارے حسیں زیور اُتار دیتے ہیں کہ یہ کیوں موج منائیں ، وُہ اِتنا دِلکش ہے کنیزیں پیر دُھلائیں تو گرتے قطروں سے گُہر وُجود میں آئیں ، وُہ اِتنا دِلکش ہے جو اُس کی ماسی کے ’’ کنگن ‘‘ پہ لکھ دے نظم کوئی سب اُس کو سر پہ بٹھائیں ، وُہ اِتنا دِلکش ہے دَہَن کی سیپ میں بتیس موتی یکجا ہیں کہیں مثال نہ پائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** نہا کے جھیل سے نکلے تو رِند پانی میں **************************************** نہا کے جھیل سے نکلے تو رِند پانی میں مہک شراب سی پائیں ، وُہ اِتنا دِلکش ہے خدا پہ اُس کے تو ایمان بت بھی لے آئیں یقین اَدائیں دِلائیں ، وُہ اِتنا دِلکش ہے دَوا پلائے جسے ٹھیک کب وُہ ہوتا ہے کہ بار بار پلائیں ، وُہ اِتنا دِلکش ہے قبا پہ اُس کی محبت کی حکمرانی ہے صدا پہ صدقے صدائیں ، وُہ اِتنا دِلکش ہے حنا کی شرح میں لکھی گئیں تمام کتب اِحاطہ کر نہیں پائیں ، وُہ اِتنا دِلکش ہے حیا پہ اُس کی تقدس غُرور کرتا ہے اُجالے دیپ جلائیں ، وُہ اِتنا دِلکش ہے جفا پہ اُس کی فدا کر دُوں سوچے سمجھے بغیر ہزاروں ، لاکھوں وَفائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** جمال ایسا جُنوں گر کہ پوج لیں تب بھی **************************************** جمال ایسا جُنوں گر کہ پوج لیں تب بھی نہ لکھی جائیں خطائیں ، وُہ اِتنا دِلکش ہے نِہال ایسا کہ خوش قامتی پہ سَروِ چمن رُکوع سے سر نہ اُٹھائیں ، وُہ اِتنا دِلکش ہے خیال ایسا کہ سوچوں پہ سکتہ طاری ہو اَرسطو اُنگلی چبائیں ، وُہ اِتنا دِلکش ہے مُحال ایسا کہ رُستم بھی کانپنے کے بعد شکست مان کے جائیں ، وُہ اِتنا دِلکش ہے کمال ایسا کہ جس کا زَوال باقی حسین ذِرا حساب لگائیں ، وُہ اِتنا دِلکش ہے جلال ایسا شہنشاہ ، قَدِ آدم عکس سروں سے بالا سجائیں ، وُہ اِتنا دِلکش ہے جمال ایسا کہ شہزادیاں تک اُترن سے لباسِ عید بنائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** نظر جھکائے تو پاکیزگی طواف کرے **************************************** نظر جھکائے تو پاکیزگی طواف کرے اُجالے پھول چڑھائیں ، وُہ اِتنا دِلکش ہے نظر اُٹھائے تو خوشبو کی بجلیاں کڑکیں مہک سی جائیں ، فضائیں ، وُہ اِتنا دِلکش ہے نظر اُٹھا کے جھکائے تو رُوح قبض کرے حیا پہ صدقے رِدائیں ، وُہ اِتنا دِلکش ہے نظر جھکا کے اُٹھائے تو ناگ ششدر و گُم فُسوں کو توڑ نہ پائیں ، وُہ اِتنا دِلکش ہے نظر ملائے تو ہم جیسے سات پشتوں تک نظر کا قرض چکائیں ، وُہ اِتنا دِلکش ہے نظر ملا کے ہٹائے تو قلب چلنے لگے پسینے چھوٹتے جائیں ، وُہ اِتنا دِلکش ہے نظر ہٹا کے ملائے تو ہوش اُڑ جائیں جنون اَدائیں سکھائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** لگائی سرخی کہ سرخی لبوں کی پھیکی لگے **************************************** لگائی سرخی کہ سرخی لبوں کی پھیکی لگے تو تتلیاں نہ ستائیں ، وُہ اِتنا دِلکش ہے لگایا اِس لیے غازہ کہ اِس کی سات تہیں حقیقی حُسن چھپائیں ، وُہ اِتنا دِلکش ہے لگائی خوشبو کہ شاید مہکتی لَپٹیں ، ذِرا بدن کی خوشبو گھٹائیں ، وُہ اِتنا دِلکش ہے لگایا اِس لیے چشمہ کہ آنکھ لڑنے سے یہ مفت مارے نہ جائیں ، وُہ اِتنا دِلکش ہے سیاہ ٹیکا ہیں یہ زیورات کہ ہم تم اُسے نظر نہ لگائیں ، وُہ اِتنا دِلکش ہے یہ ہیرا ناک میں پہنا کہ سادہ لوح مُرید نظر نہ لب پہ ٹکائیں ، وُہ اِتنا دِلکش ہے اَنگوٹھی منگنی کی منگنی بغیر پہنے ہے کہ لوگ سر نہ کھپائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** چڑھے جو قرب کی خوشبو تو گُل رہیں تازہ **************************************** چڑھے جو قرب کی خوشبو تو گُل رہیں تازہ مہینے بیتتے جائیں ، وُہ اِتنا دِلکش ہے وُہ چُومے خشک لبوں سے جو شبنمِ گُل کو تو پھول پیاس بجھائیں ، وُہ اِتنا دِلکش ہے گُلاب ، موتیا ، چنبیلی ، یاسمین ، کنول اُسے اَدا سے لُبھائیں ، وُہ اتنا دلکش ہے گُلاب ، مشکِ ختن ، زَعفران ، تر ، لوبان بدن کو سونگھتے جائیں ، وُہ اِتنا دِلکش ہے گُلاب کاغذی ہاتھوں میں خوشبو دینے لگیں کئی تو اُگتے بھی جائیں ، وُہ اِتنا دِلکش ہے پڑھا کے تتلی کو اُس کا ترانہ بولی بہار پروں پہ لکھ کے یہ لائیں ، وُہ اِتنا دِلکش ہے گُلاب گھر سے ہی ہاتھوں میں لے کے نکلا کہ گُلاب آتے نہ جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** جناب عشق نہ ہو جائے پڑھتے پڑھتے غزل **************************************** جناب عشق نہ ہو جائے پڑھتے پڑھتے غزل مزید آگے نہ جائیں ، وُہ اِتنا دِلکش ہے گلاب چومتے ہیں صرف ہاتھ بھر زُلفیں لباس موج منائیں ، وُہ اِتنا دِلکش ہے حجاب اُتارے ، ملے ترکِ مے کشی کا ثواب کہ رِند جام گرائیں ، وُہ اِتنا دِلکش ہے چناب اُس کے اِشارے سے ہو گیا دو نیم گھڑے کو آگ لگائیں ، وُہ اِتنا دِلکش ہے نصاب میں ہُوا شامل جو حُسن پر اِک باب تو سال بھر یہ پڑھائیں ، وُہ اِتنا دِلکش ہے نقاب اُٹھائے تو سورج کا دِن نکلتا ہے چراغ دیکھ نہ پائیں ، وُہ اِتنا دِلکش ہے جواب اِس لیے دیتا نہیں سلام کا وُہ کہ لوگ مر ہی نہ جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** کھلے جو عشق کا مکتب تو ’’ لب پہ آتی ‘‘ نہیں **************************************** کھلے جو عشق کا مکتب تو ’’ لب پہ آتی ‘‘ نہیں دُعا میں دِل سے پڑھائیں ، ’’ وُہ اِتنا دِلکش ہے ‘‘ معلمہ بنے ، دو منشی تین ہفتوں تک تو حاضری ہی لگائیں ، وُہ اِتنا دِلکش ہے کلاس چھوڑنا تو دُور اُس کے سب شاگرد بروزِ عید بھی آئیں ، وُہ اِتنا دِلکش ہے سنیں تو چھٹی کی دَرخواست کے سِوا فَر فَر سب اُس کے طلبہ؟ سنائیں ، وُہ اِتنا دِلکش ہے توجہ لینے کو اُس کی شریف بچے کریں عجیب عجیب خطائیں ، وُہ اِتنا دِلکش ہے وُہ صرف پاس نہیں اَپنے پاس کرتا ہے سو بچے جان لڑائیں ، وُہ اِتنا دِلکش ہے کلاس ہے کہ مریدی کا سلسلہ کوئی چڑھاوے بچے چڑھائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** وُہ ہنس رہا ہو تو کچھ بچے آ کے کہتے ہیں **************************************** وُہ ہنس رہا ہو تو کچھ بچے آ کے کہتے ہیں یہ اِملی کھا کے دِکھائیں ، وُہ اِتنا دِلکش ہے بہت پسند ہے لڑکوں کو علم کی خوشبو رُومال اُس کا چرائیں ، وُہ اِتنا دِلکش ہے پٹائی کر کے ہٹے تو پٹے ہُوئے لڑکے چھڑی کو چومتے جائیں ، وُہ اِتنا دِلکش ہے جو لکھ کے بھیجے شکایت تو باپ صاحب بھی لکھائی لب سے لگائیں ، وُہ اِتنا دِلکش ہے بجے جو چھُٹی کی گھنٹی تو بچے ہچکی زَدہ زَمانے بھر کو رُلائیں ، وُہ اِتنا دِلکش ہے شبِ فِراق پہ مضمون بچے لکھ لائے اَب اور کیسے بتائیں ، وُہ اِتنا دِلکش ہے جو اِمتحان لے ، شاگرد اُس کو نمبر دیں کئی تو دیتے ہی جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** رِیاضی دان اُسے فرض کر کے دیکھیں تو **************************************** رِیاضی دان اُسے فرض کر کے دیکھیں تو رِیاضی بھول ہی جائیں ، وُہ اِتنا دِلکش ہے کہے جو فرض کریں ایکس ، وائے سے ہے بڑا سب ایکس جشن منائیں ، وُہ اِتنا دِلکش ہے جذر بھی لے لیں اَگر دِلکشی کا دِلبر کی جواب گن نہیں پائیں ، وُہ اِتنا دِلکش ہے جو اُس کا مجنوں بنے ، اَرشمیدس اُس کو کہے مجھے رِیاضی پڑھائیں ، وُہ اِتنا دِلکش ہے صفر ، صفر ہے فقط اِس لیے کہ کر نہ سکا شمار اُس کی اَدائیں ، وُہ اِتنا دِلکش ہے کمالِ حُسن کو ہم دو سے ضرب دیتے مگر عدد کہاں سے منگائیں ، وُہ اِتنا دِلکش ہے رِیاضی میں جہاں ’’بے اِنتہا‘‘ بتانا ہو دو آنکھیں اُس کی بنائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** کرائے فرض وُہ جو کچھ بھی فرض ہو جائے **************************************** کرائے فرض وُہ جو کچھ بھی فرض ہو جائے فریضے بڑھتے ہی جائیں ، وُہ اِتنا دِلکش ہے بدن کی حد پہ کسی ’’حادہ زاوِئیے‘‘ نے کہا اِس علم کا تو بتائیں ، وُہ اِتنا دِلکش ہے مثلثاتِ بدن سب ہیں چار ’’ضلعوں‘‘ کی اُصول سر کو کھجائیں ، وُہ اِتنا دِلکش ہے وُہ دائرے کو مثلث کہے یا خط کو عُمود سر اَپنا سارے ہلائیں ، وُہ اِتنا دِلکش ہے چلا کے ذِہن میں کچھ لڑکے حُسن کی ’’پرکار‘‘ ’’مُماسِ‘‘ عشق بنائیں ، وُہ اِتنا دِلکش ہے وُہ ’’مستطیل‘‘ بھی کھینچے تو طالب علموں کو نظر ’’مربعے‘‘ ہی آئیں ، وُہ اِتنا دِلکش ہے کسی کے حُسن کے ’’تکمیلی زاوِئیے‘‘ توبہ ’’وَتَر‘‘ سروں کو ہلائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** چلے جو مست ہِرن ، شہ جہان ، تاج مَحَل **************************************** چلے جو مست ہِرن ، شہ جہان ، تاج مَحَل قدم قدم پہ بنائیں ، وُہ اِتنا دِلکش ہے سکندر اَصل میں اُس کی تلاش کرتے تھے کہ خالی ہاتھ نہ جائیں ، وُہ اِتنا دِلکش ہے چرا کے عکس ، حنا رَنگ ہاتھ کا قارُون خزانے ڈُھونڈنے جائیں ، وُہ اِتنا دِلکش ہے پکارا رو کے یہ دیدارِ عام پر حاتم حضور ایسی عطائیں ، وُہ اِتنا دِلکش ہے جھلک دِکھانے کی رَکھیں جو شرط جوئے شیر ہزاروں کوہ کن آئیں ، وُہ اِتنا دِلکش ہے تناسب ایسا کہ نوشیروان رو کے کہے حُضور عدل سکھائیں ، وُہ اِتنا دِلکش ہے ذَہین لوگ سرِ کوچہ ’’یافتم‘‘ کہہ کر دَھمال ڈالتے جائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** ہمیں مبالغے کی کیا پڑی ہے ، لو صاحب! **************************************** ہمیں مبالغے کی کیا پڑی ہے ، لو صاحب! ہم آنکھوں دیکھا بتائیں ، وُہ اِتنا دِلکش ہے غزل میں آئے تو مصرعے سلام کرتے ہیں حروف ہار بنائیں ، وُہ اِتنا دِلکش ہے جنہوں نے دیکھا نہیں اُس کو ، شاعری نہ کریں یا مجھ سے سیکھ کے جائیں ، وُہ اِتنا دِلکش ہے سرہانے میرؔ کے ٹُک فاتحہ کو گر وُہ جھکے تو میرؔ بول نہ پائیں ، وُہ اِتنا دِلکش ہے غزل جو پڑھ کے سنائی ، کہا تمہارے رَقیب یہ منہ زَبانی سنائیں ، وُہ اِتنا دِلکش ہے غزل کا پوچھے جو اِنعام ، دَست بستہ کہوں بس اَپنا نام بتائیں ، وُہ اِتنا دِلکش ہے جو اُس پہ لکھی غزل پڑھ کے مر گیا اُس کا جنازہ میرؔ پڑھائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** ہے اُس کے کوچے میں صدقے کی اِس قَدَر بھرمار **************************************** ہے اُس کے کوچے میں صدقے کی اِس قَدَر بھرمار فقیر گاڑی پہ آئیں ، وُہ اِتنا دِلکش ہے گلی میں شوخ کی دائم مشاعرے کا سماں شجر بھی شعر سنائیں ، وُہ اِتنا دِلکش ہے گلی سے اُس کی گزر کر جو نہ بنے شاعر تو اُس کو اُردُو پڑھائیں ، وُہ اِتنا دِلکش ہے گلی میں اُس کی مساوات اَعلیٰ دَرجے کی صف ایک جیسی بنائیں ، وُہ اِتنا دِلکش ہے بہت سے ہیں سَرِ دِہلیز اِتنی مُدّت سے کہ اُن کو خط یہیں آئیں ، وُہ اِتنا دِلکش ہے جو اُس کے کوچے میں پاؤں پہ چل کے آتے ہیں وُہ چڑھ کے کاندھوں پہ جائیں ، وُہ اِتنا دِلکش ہے بھُنے کبوتروں کی تین سو دُکانیں ہیں خطوط اِس قَدَر آئیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** کبھی کبھی ہمیں لگتا ہے بھیگے لب اُس کے **************************************** کبھی کبھی ہمیں لگتا ہے بھیگے لب اُس کے ہَوا میں شہد ملائیں ، وُہ اِتنا دِلکش ہے خیال میں بھی کوئی لب پہ اُنگلی پھیرے تو دَھنستے سے نظر آئیں ، وُہ اِتنا دِلکش ہے اُداس غنچوں نے جاں کی اَمان پا کے کہا یہ لب سے تتلی اُڑائیں ، وُہ اِتنا دِلکش ہے وُہ پھونک مارے تو سب گہرا سانس لیتے ہیں کئی تو ہونٹ چبائیں ، وُہ اِتنا دِلکش ہے لبوں کی دِلکشی یاقوتِ سُرخ پر بھاری کہ یہ تو آگ لگائیں ، وُہ اِتنا دِلکش ہے کلی کے کان میں دے کر اَذان خوشبو کی لبوں کا کلمہ پڑھائیں ، وُہ اِتنا دِلکش ہے جو اُنگلی رَکھ کے لبوں پر اِشارہ چپ کا کرے تو پھول سکتے میں آئیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** سریلا اِتنا ہے کہ ساز اَپنی آوازیں **************************************** سریلا اِتنا ہے کہ ساز اَپنی آوازیں سُروں سے اُس کے ملائیں ، وُہ اِتنا دِلکش ہے نشیلا اِتنا ہے کہ جام سوچ کر آنکھیں مزے سے کانپ سے جائیں ، وُہ اِتنا دِلکش ہے سجیلا اِتنا ہے کہ گرتی بوندیں جھرنے کی بدن سے نظریں چرائیں ، وُہ اِتنا دِلکش ہے رَسیلا اِتنا ہے کہ کلیاں رَس بھرائی کو طرح طرح سے منائیں ، وُہ اِتنا دِلکش ہے چھبیلا اِتنا ہے کہ پیراہن کی خوشبو پر گلاب غزلیں سنائیں ، وُہ اِتنا دِلکش ہے رَنگیلا اِتنا ہے کہ سات رَنگ اُس کے حُضور سفید سے نظر آئیں ، وُہ اِتنا دِلکش ہے غصیلا اِتنا ہے کہ بادشاہ وَقتِ کلام اَمان جان کی پائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** نفیس اِتنا ہے کہ کرنیں غسل کرنے کو **************************************** نفیس اِتنا ہے کہ کرنیں غسل کرنے کو بدن کی جھیل پہ آئیں ، وُہ اِتنا دِلکش ہے حسین اِتنا ہے کہ معجزے تعجب سے بس اُس کو تکتے ہی جائیں ، وُہ اِتنا دِلکش ہے منور اِتنا ہے چہرہ کہ سونے سے پہلے چراغ اُس کو بجھائیں ، وُہ اِتنا دِلکش ہے متین اِتنا ہے وُہ رُعبِ حُسن سے ، ہے مُحال بَہَادُر اُس کو ہرائیں ، وُہ اِتنا دِلکش ہے سفید اِتنا ہے کہ رَنگ’’گہرا‘‘ کرنے کو مہینوں دُودھ پلائیں ، وُہ اِتنا دِلکش ہے مشین اِتنا ہے دِل وِل چرانے میں خوش لب کہ لوگ ہِل نہیں پائیں ، وُہ اِتنا دِلکش ہے یقین اِتنا ہے اَپنے جمال پر کہ نہ لے خود اَپنی ماں کی دُعائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** جو اُس کو چومنا چاہیں ، اَگر وُہ چومنے دے **************************************** جو اُس کو چومنا چاہیں ، اَگر وُہ چومنے دے تو چوم پھر بھی نہ پائیں ، وُہ اِتنا دِلکش ہے جو بالمشافہ ملیں ، سر جھٹک کے قصۂ شب بطورِ خواب سنائیں ، وُہ اِتنا دِلکش ہے سمندر اُس کے قدم چومنے کو آگے بڑھیں جوار بھاٹے تب آئیں ، وُہ اِتنا دِلکش ہے صنم کے سامنے صاحب ، سخن تو دُور کی بات! یہ دِل دَھڑکنے نہ پائیں ، وُہ اِتنا دِلکش ہے شبیہ سائے کی اُس کے جو خواب میں دیکھیں وُہ گھر کبھی نہ بسائیں ، وُہ اِتنا دِلکش ہے غزل سے آپ کو اَندازہ ہو گیا ہو گا نہیں تو ۔ ۔ ۔ میں جائیں ، وُہ اِتنا دِلکش ہے (نوٹ: خالی جگہ میں باغ پڑھا جائے۔ شکریہ) جو جان اَٹکے کسی عاشقی میں بسمل کی تو اُس کا قصہ سنائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** جو کام سوچ رہے ہیں جناب دِل میں اَبھی **************************************** جو کام سوچ رہے ہیں جناب دِل میں اَبھی وُہ کام بھول ہی جائیں ، وُہ اِتنا دِلکش ہے مگن تھے مینہ کی دُعا میں سبھی کہ وُہ گزرا بدل دیں سب کی دُعائیں ، وُہ اِتنا دِلکش ہے ستارے توڑ کے لانے کی کیا ضرورت ہے ستارے دوڑ کے آئیں ، وُہ اِتنا دِلکش ہے ہم اُس کے چہرے سے نظریں ہٹا نہیں سکتے گلے سے کیسے لگائیں ، وُہ اِتنا دِلکش ہے وُہ جتنا جسم تھا ، اُتنا غزل میں ڈھال لیا طلسم کیسے دِکھائیں ، وُہ اِتنا دِلکش ہے غلام بھیجتا ، سر آنکھوں پر بٹھا لیتے اُسے کہاں پہ بٹھائیں ، وُہ اِتنا دِلکش ہے زَبان وَصف سے عاجز ، حُروف مفلس تر قلم گھسیٹ نہ پائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** مجھے شروع میں پڑھا کر ہیں دَم بخود شاعر **************************************** مجھے شروع میں پڑھا کر ہیں دَم بخود شاعر اَب آگے کس کو پڑھائیں ، وُہ اِتنا دِلکش ہے اَکیلے گیسوؤں کا حُسن اُٹھا نہیں سکتا گھٹائیں ہاتھ بٹائیں ، وُہ اِتنا دِلکش ہے چمن میں اُس نے جہاں دونوں بازُو کھولے تھے وَہاں کلیسا بنائیں ، وُہ اِتنا دِلکش ہے طلسمِ حُسن ہے موجود لفظوں سے اَفضل لغت جدید بنائیں ، وُہ اِتنا دِلکش ہے جو اُس کے شہر میں آتے ہیں ، سانس بعد میں لیں سفینے پہلے جلائیں ، وُہ اِتنا دِلکش ہے جو شعر جانِ غزل تھا ، وُہ جان کر چھوڑا کہ آپ مر ہی نہ جائیں ، وُہ اِتنا دِلکش ہے جب اُس پہ لکھی غزل پڑھ کے یار دَنگ ہیں قیسؔ ہم عکس کیسے دِکھائیں ، وُہ اِتنا دِلکش ہے #شہزادقیس . **************************************** Table of Contents **************************************** **************************************** ۔ اختتام ۔ مجموعہ کلام "وہ اتنا دلکش ہے" ۔ **************************************** ۔ اختتام ۔ مجموعہ کلام "وہ اتنا دلکش ہے" ۔ سدا خوش رہیے ۔ شہزادقیس **************************************** Table of Contents **************************************** **************************************** ((End Text)) **************************************** ******************************* Find Shahzad Qais on Social Media ******************************* YouTube Instagram Twitter FaceBook ******************************* میری تمام کتب ڈاؤن لوڈ کیجیے ******************************* تمام کتب ایک ذپ فائل کی صورت میں http://sqais.com/QaisAll.zip "لیلیٰ" از "شہزادقیس" http://sqais.com/QaisLaila.pdf http://sqais.com/QaisLaila.html http://sqais.com/QaisLaila.txt "دِسمبر کے بعد بھی" از "شہزادقیس" http://sqais.com/QaisDecember.pdf http://sqais.com/QaisDecember.html http://sqais.com/QaisDecember.txt "تتلیاں" از "شہزادقیس" http://sqais.com/QaisTitliyan.pdf http://sqais.com/QaisTitliyan.html http://sqais.com/QaisTitliyan.txt "عید" از "شہزادقیس" http://sqais.com/QaisEid.pdf http://sqais.com/QaisEid.html http://sqais.com/QaisEid.txt "غزل" از "شہزادقیس" http://sqais.com/QaisGhazal.pdf http://sqais.com/QaisGhazal.html http://sqais.com/QaisGhazal.txt "عرفان" از "شہزادقیس" http://sqais.com/QaisIrfan.pdf http://sqais.com/QaisIrfan.html http://sqais.com/QaisIrfan.txt "انقلاب" از "شہزادقیس" http://sqais.com/QaisInqilab.pdf http://sqais.com/QaisInqilab.html http://sqais.com/QaisInqilab.txt "وُہ اِتنا دِلکش ہے" از "شہزادقیس" http://sqais.com/QaisDilkash.pdf http://sqais.com/QaisDilkash.html http://sqais.com/QaisDilkash.txt "نمکیات" از "شہزادقیس" http://sqais.com/QaisNamkiyaat.pdf http://sqais.com/QaisNamkiyaat.html http://sqais.com/QaisNamkiyaat.txt "نقشِ ہفتم" از "شہزادقیس" http://sqais.com/QaisNaqsh.pdf http://sqais.com/QaisNaqsh.html http://sqais.com/QaisNaqsh.txt "اِلہام" از "شہزادقیس" http://sqais.com/QaisIlhaam.pdf http://sqais.com/QaisIlhaam.html http://sqais.com/QaisIlhaam.txt "شاعر" از "شہزادقیس" http://sqais.com/QaisShayer.pdf http://sqais.com/QaisShayer.html http://sqais.com/QaisShayer.txt "بیت بازی" از "شہزادقیس" http://sqais.com/QaisBait.pdf http://sqais.com/QaisBait.html http://sqais.com/QaisBait.txt ********************** آپ کو اس متن کی اشاعت کی اجازت ہے ********************** آپ ان تخلیقات کو اپنے ویب سائٹ، بلاگ، فیس بک، ٹوئٹر، سوشل میڈیا اکاؤنٹس، اخبار، کتاب، ڈائجسٹ وغیرہ میں شائع کر سکتے ہیں بشرطیکہ اس میں ترمیم نہ کریں، شہزادقیس کا نام بطور مصنف درج کریں اور اس تخلیق کی اشاعت غیر تجارتی مقاصد کے لیے ہو یہ تخلیقات کریٹو کامنز لائسنس کے تحت شائع کی گئی ہیں جس میں اس تخلیق سے ماخوذ کام کی نشر و اشاعت کی اجازت نہیں ہے۔۔ مزید تفصیلات اس لنک پر ملاحظہ فرمائیے https://creativecommons.org/licenses/by-nc-nd/4.0/legalcode کسی اور طرح کی اشاعت کے لیے Info@SQais.com پر رابطہ فرمائیے۔